Ianuarius

Sanctorum sanctus hic circunciditur Agnus.

Munera dant reges; quem mergit fonte Iohannes

Scandens de lauacro fit ductus flamine sacro

Ad loca deserti, temptandus fraude superbi.

5

Afflictus peni<tu>s transiuit ad ethera Felix.

Abbas praeclarus scandit celestia Maurus.

Qui sancte uixit Wistanus presul obiuit.

Sponsa Deo munda nitet Agnes sanguinis unda.

Victa tenens castra Vincentius astra.

10

Mutat iter Saulus potiori nomine Paulus.

Februarius

Sidus uirginum conscendit Brigida celum.

Hostia lege datur; genitrix sacra purificatur.

Virgo Werburga percepit gaudia summa.

Iure Latinorum uernum tempus capit ortum.

15

Sponso iuncta pio gaudet Scolastica uirgo.

Qui deuicit Adam retro cedit, uictus ab Adam.

Iure super petram scandisti, Petre, cathedram.

Virgo Deo grata transit Mildburga beata.

Hic fac bissextum; Mathie post cole festum.

20

Aula Dei patuit Oswaldo pridie Martis

      Summo pontifici celsa petendo poli.

Martius

Presul ad astra plus hac transit luce Deuuius.

Hic secreta poli conscendis, papa Gregori.

Rex Eadwardus ouat quem gratia diva coronat.

25

Mira potens egit: de funere Lazarus exit.

Presul transiuit Cutbertus et astra petiuit.

Etas hic lune quot sint designat epacte.

Si feriam noscas, capies hic solis epactas.

Concepti Christi fuit ipsa dies crucifixi.

30

Mors est calcata qua surgit ulta beata.

Aprilis

Christo dilecte celesti rore referte;

Hic petis, Ambrosi, gaudia summa poli.

Aelfegus sanctus celos petit, hic lapidatus.

Accipit ante Deum Georgius ense tropheum.

35

Marco festiua lux; hecque Rogatio prima.

Hic iunior transit Wilfridus et ethera scandit.

Maius

Palme martirii Iacobi, lux hecque Philippi.

Detegitur Lignum, mundo medicabile signum.

Fit laus ethereis Domino scandente choreis.

40

Estas accedit, uer deficiendo recedit.

Spiritus aduenit, deuotaque corda repleuit.

Celica Dunstanus conscendit regna beatus

Hec Augustini lux est festiua beati;

Hic flos scriptorum Beda plaudit in arce polorum.

Iunius

45

Anglia quem genuit Bonifacius, urbsque recepit

Mogontina patrem, celi conscendit ad arcem.

Vera, Gildarde, uita fruerisque, Medarde.

Celos Eadburga scandens nos crimine purga.

Martir Geruasi Christi testisque: Protasi

50

Vitalis nati, conscenditis astra, beati.

Dum fit solstitium solis tenet orbita Cancrum.

Martirio primus decoras, Albane, Britannos.

Hic plusquam uates oritur de matre Iohannes.

Cum Paulo Petrus passus petit ethera letus.

Iulius

55

Ciuibus addicti celi patria Benedicti

Luce sub hac sacra colitur translatio sancta.

Occidit absque dolis Kenelmus fraude sororis.

Hic Magdalena fruitur iam luce serena.

Hec lux Christofori Iacobi quoque constat honori

60

Atque Cucufati pro Christo martirizati.

Visio turbatis uirtusque patet deitatis.

Augustus

Liberabit Petrus celesti preduce fretus.

Rex petit Oswaldus celestia regna beatus.

Occubuit Sixtus quem ditat in ethere Christus.

65

Astra petit iustus Laurentius, igne perustus.

Gaudes, Ypolite, dum scandis gaudia uite

Cum sociis calda hic tecum martirizatis.

Scandit Virgo thorum super agmina cuncta polorum.

Laus est magna Dei sacra passio Bartholomei.

70

Pro Christo uere passus nos, Rufe, tuere.

Hic Augustinus in sacro dogmate mirus.

Ad Christum transi<s per> gaudia summa, Sabine.

Occisus uates summus baptista Iohannes;

Hostis quod celat proprium caput ipse reuelat.

September

75

Confessor Christi celestia scandis, Egidi.

Vincitur a turbis: fit papa Gregorius urbis.

Hac rutilat nata sub luce Maria beata.

Crux exaltatur quo nostra salus reparatur.

Casu Mathei lux hec est festa diei.

80

Pro Christo passa petit ethera legio sancta.

Cosmas cum sancto celum penetrat Damiano.

Letentur celis qui festa colunt Michaelis.

Interpres legis summi petit atria regis

Mundo preclarus doctor Ieronimus almus.

October

85

Virgineis castris, Fidis, sociaris in astris.

Lux rutilat clara qua fit translatio sancta

Presulis Oswaldi, paradisi consulis almi.

Alme Dionisi, patet aula tibi paradisi,

Cum sociis sanctis pro Christi nomine passus.

90

Wilfridi fossa tolluntur presulis ossa.

Carne manet spreta Lucas in luce suprema.

Gaudia sunt mundi Symonis Iudeque triumphi.

Nouember

Omnibus hec Sanctis celebris lux emicat aruis.

Incipit hic dura pluuialis et aspera bruma.

95

Hic migrat tutus Martinus carne solutus.

Bricius hic sanctus decessit corpore castus.

Eadmundo regi fit peruia ianua celi.

Sponso cum Christo gaudes, Cecilia uirgo.

Hic, Clemens, transis, comes alme felicitatis.

100

Testificante Syna uictrix rutilat Katerina.

Petri germanus passus mutis uelut agnus:

      Sedes Andreas transit ad ethereas.

December

Signis preclarus petit astra pius Nikolaus.

Martir uirgo pia celos petit alma Lucia.

105

Morte pia Thoma frueris sine fine corona.

Virgineus partus humanos protulit artus

Corporeaque domo qui Deus est fit homo.

Gens insana fremit Stephanum lapidando premit.

Summas ac ueras celesti nectare plenas

110

Inuitante dapes Christo capis, alme Iohannis.

Virginis annorum proles fuit alma duorum

In teneris menbris dum seuit regius ensis.

Transitus hic sancti Siluestri; finis et anni.