Cuidam monacho peripatetico me supra modum extollenti
et de fonte meo areae sue irriguum exigenti

Pinge, poeta, viros variosque infunde colores:

      Sola facit virtus, non levis aura virum.

Nos quasi terra gravis, ager aridus, area sicca,

      Inculti, steriles, quos aqua nulla rigat;

5

Vos quasi terra ferax, quasi fructibus arbor onusta

      Et velut irriguo vellus utroque madens.

Fructibus autunnum, ver floribus hactenus expers

      Ditat hiems et inops divitis auget opes.

Fert oleum, licet hoc careat, fatuus sapienti

10

      Et madidum vellus area sicca rigat.

Dat capra vellus ovi, de spinis colligis uvas,

      Poma ferunt tribuli petraque fundit aquas.