Potenti mea semper exigenti, semper sua promittenti, me semper,
ut quererem, provocanti, numquam, ut acciperem, vocanti

Dives habet pretio, precibus miser: emit uterque,

      Sed levius precio quam prece dives habet.

Vis dare? Da gratis! Dat gratis nemo rogatus,

      Absque gravi precio nemo rogata tulit.

5

Dicere cum suevi "Rogo", nunquam "Suscipe", semper

      Hactenus audivi, quod modo dico: "Rogo".

Da, non redde michi! Precium non exigo, munus

      Postulo, dumque silent munera, scripta rogant.

Sepe rogare soles: aliquando disce rogari!

10

      Sumere multa soles: incipe pauca dare!

Ipse rogare doces et doctus es ipse rogare:

      Sic igitur doctus sumere disce dare!

Nil gratis tribuis, nil gratis accipis; a te

      Nemo tulit gratis munera, nemo tibi.

15

Nil minuis seu multa rogans seu multa rogatus,

      Multa rogans recipis, multa rogatus habes.