Sic vegetata sedent sibimet plerumque decenter,

      Quando unum ex variis continuatur opus.

Pluribus in rebus habet hoc pulcherrimus ordo,

      Hoc etiam eloquii pollet in arte satis,

5

Ampla quibus sacrae scripturae prata redundant.

      Et nemus ambroseo spirat odore pium.

Haec ego dum lustro, dum per violaria curro,

      Quas vehat hic calathus ungue recido rosas.

Hanc sancto sumpsit sancti de dogmate Pauli,

10

      Illius misit quod stilus Arcadicus.

Compositam sanctamque ornat sermone loquelam,

      Postquam virtutes enumeravit ita.

Quo dictis variis aptantur dicta decenter,

      Sensus et egregiae panditur ordo viae.

15

"Vos", ait, "hortamur ne a vobis, plebs pia fratrum,

      Capta sit in vacuum gratia sancta dei.

Nempe", ait, "audivi, vates, te tempore grato,

      Hincque die studui ferre salutis opem.

Nunc nunc ecce patet, patet acceptabile tempus.

20

      Gratificaeque dies ecce salutis adest.

Nullius et nulli maculans offensio detur,

      Ne merito nostrum vile sit officium.

Aptemus sed nos sic rebus in omnibus, omnis

      Nostra sit ut summi turba ministra dei.

25

Plurima ut in nobis vigeat patientia, quo nos

      Turbo procella mali non superare queat.

Conditio nos dura premens, angustia laedens,

      Pravorum impietas iure probando beent.

Carcerum in inluvie, seu seditionibus atris,

30

      Scandere purgatos caelica regna decet.

Nostra laborifluis sit mens exercita curis,

      Simus et insomnes, cor sit et omne vigil.

Mundities sit nobis casta, scientia sollers,

      Longanimes simus, et sine sorde luis.

35

Mensque iugum domini referat tranquilla suave,

      Flaminis ut sancti sumere dona queat.

Quo non fictus amor sit, sed dilectio vera,

      Vt possit verus mox dare vera sonus.

In virtute dei, qua cuncta creata reguntur,

40

      Quae convexa poli, rura, Thetimque tenet".

Incipit oppositis iam nunc opponere quaedam,

      Comere et eloquium sic variante stilo.

"Arma", ait, "ast aequi dextra laevaque gerantur,

      Miles ut altithroni victor utrimque cluat.

45

Per decus hinc clarum, per dedecus inde repressum,

      Cernimur infames, sit bona fama bonis.

Sit seductorum tanquam sententia lata

      In nos, veraces nos tamen esse decet.

At velut ignoti, tandem sumus agnita plebes,

50

      Vt moribunda manus, vivimus ecce tamen.

Casti grata cohors non mortificata manemus,

      Ceu tristes, semper laetula turba sumus.

Flens ut egens sumus, et ditemus in agmine multos,

      Nil et habendo amplas possideamus opes".