Rex obiit, nec rege carens caret Anglia pace.

Hec Henrice creas miracula, primus in orbe.

Rex nondum, presens nondum, tamen efficis illud

Quod rex non potuit presens, dignissime sceptris.

5

Quam bene sceptra geres, qui regni flectis habenas!

Nondum sceptra gerens, dum trans maris alta moraris,

Per te, sed sine te, fruitur tamen Anglia pace.

Hec aurora tuos precessit, Phebe, nitores.

Ecce uenis radians, radii sunt aduenientis

10

Certa fides, hilaris clementia, cauta potestas,

Leue iugum, uindicta decens, correctio dulcis,

Castus amor, libratus honor, frenata uoluptas.

His igitur radiis, dum sceptra decora decoras,

Tu diadema magis quam te diadema perornat.

15

Anglia letali iamdudum frigore torpens,

Nunc solis feruore noui rediuiua calescens,

Erigis impressum terre caput, et uacuatis

Mesticie lacrimis, pre leticia lacrimaris.

Cum lacrimis hec uerba tuo profundis alumpno:

20

"Spiritus es, caro sum, te nunc intrante reuixi".