Nobilitas innata tibi probitatis honorem,

Armipotens Alfrede, dedit probitasque laborem,

Perpetuumque labor nomen, cui mixta dolori

Gaudia semper erant, spes semper mixta timori.

5

Si modo uictor eras, ad crastina bella pauebas,

Si modo uictus eras, et crastina bella parabas.

Cui uestis sudore iugi, cui sica cruore

Tincta iugi, quantum sit onus regnare probarunt.

Non fuit inmensi quisquam per climata mundi,

10

Cui tot in aduersis uel respirare liceret.

Nec tamen aut ferro contritus ponere ferrum,

Aut gladio potuit uite finisse dolores.

Iam post transactos uite regnique labores,

Christus ei sit uera quies sceptrumque perhenne.