Quod Moyses ardere rubum sanumque uidebat,

Vellus quod Gedeoni uacuatum humore stupebat,

Virginis et matris partu reserata patescunt;

Quod mare conseruans iustos perdit Pharaonem,

5

Quod Naaman lepram tinctus Iordane relinquit,

Hoc nostri baptisma patris nostrumque reuelat.

Dum ueteri sacra Melchisedech noua dat patriarche,

Dum Dauid Abimelec se prouehit inspiciente,

Viuificam carnem dans et datus ipse figurat.

10

Abel quem morti fratris manus inuida mittit,

Ioseph quem genti fratrum fallacia uendit,

Viuifice mortis designant brauia nobis.

Sabbata dum legis lex nuntia sanctificauit,

Sabbata dum Dominus requiescens clarificauit,

15

Vita beata sui prefixit signa sepulchri.

Samson qui portas laturus in urbe tenetur,

Ionas qui triduo sorbentis uentre moratur,

Significant mortemque Dei mortisque triumphum.

Terris raptus Enoc diuinitus in paradisum,

20

Helias rutilo transuectus in ethera curru,

Ascensus Christi signant hominisque Deique.

Ignis splendorem Iudeis nocte ministrans,

Nubes temperie lucis feruore redundans,

Spiritus alme, tuos aduentus signat uterque.

25

Fuderunt miram miranda crepuscula lucem;

Hac pius, his fortis Deus, hac splendescit et illis.