1

En adest Caesar pius et benignus,

Orbe qui toto rutilat coruscus,

Atque prae cunctis bonitate pollet

Munere Christi.

2

Cernuus, prudens, sapiens, modestus,

Mitis et clemens, moderatus actu,

Temperans, fortis, probus et honestus,

Censor et aequus.

3

Hic decus Iudae, ecclesiae paterque,

Ornat hanc sollers, recreat, fovetque,

Erudit, munit, colit, instruitque

Dogmate largo.

4

Hic potens armis, domino favente,

Viribus gentes reprimit superbas,

Harum et hic victor subigendo calcat

Colla triumphans.

5

Cuius adventus, miserante Christo,

Et nitens multum facies serenat

Civitas, temet, populosa, nempe

Aurelianis.

6

Hinc deo laudes agita perennes,

Cuius hic nutu properavit ad te,

Huius et vultum tibimet videndum

Praebuit ecce.

7

Has canat clerus, simul omnis et plebs,

Has senex pangat, puer atque parvus,

Pauper et dives reboent ovantes

Pectore puro.

8

Hoc chorus cleri populique turba

Safficum carmen recinens precetur,

Det Hludoroico ut deus imperandi

Tempora longa.

9

Prosperum clemens ferat, omne semper

Pellat adversum, procul et repellat,

Huius et vitam tueatur aevo

Tempore clemens.

10

Caesaris huius valeat per aevum

Nobilis coniunx sive clara proles,

Gaudeat felix populus domusque

Pace perenni.

11

Muniunt urbem hanc proceres fideles,

Qui pio Christo sua dedicarunt

Hostis adversi tolerando bella

Corpora casta.

12

Hi duces sancti reducesque sunto,

Vt tui, Caesar, foveantque temet,

Horum et obtentu superes duelles,

Poscimus omnes.

13

Actibus cunctis placeas tonanti,

Et dei leges mediteris almas,

Quis viam vitae valeas tenere

Tramite recto.

14

Temporis huius spatio peracto,

Alta conscendens subeas polorum,

Te pius captet chorus angelorum,

Et sibi iungat.

15

O decus regni, imperii propago,

Macte tu semper vigeas, Hluthari,

Et patris sedem teneas potenter

Saecla per ampla.

16

Sit patri et nato, tibi, spiritusque,

Splendor aeternus honor atque perpes

Nunc ut in praesens, ita et in futura

Saecula semper.