Ibant in theatrum data

Auro largiflui munera cesaris.

Carrucas ibi gemmeas

Traces regis equi abripiunt feri,

5

It celo populi fremor,

Solem nube tegit pulvis Olimpicus,

Sudant cornipedes citi,

Ardent axe rote verbere concite.

Turmas belligeras vehit

10

Turri dispositas Indica belua,

Castris mobilibus fuit

Innox pugna diu percita bestiis,

Quas cursus vice prepetes

Certarunt pedites vincere velites.

15

Ille sed celeres ruunt,

Acres horridulo gutture barriunt,

Hostes ore truci petunt

Et proboscidibus proxima verberant.

Quis nomen vetus hoc erat,

20

Lucas nosse boves plebs avet urbica.

Hos Lucania primitus

Vrbi victa dedit sub duce nobili;

Tandem Grecia subdita

Nomen dans animal fert elefanteum.

25

Strene preterea nitent

Plures aureole munere regio,

Olim principibus probis

Iani principiis auspicio date

Fausto temporis omine,

30

Vt ferret ducibus strenua strenuis

Annus gesta recentior.

Illas nobilitas cesaribus piis,

Rex dignis procerum dabat,

Vrbi quas Latie tum iuveni dedit

35

Rex Titus Tatius prior

Festas accipiens paupere munere

Verbenas studio patrum,

Sollers posteritas quas creat aureas;

Servant dona tamen notam

40

A luco veteri nomine Strenie.

Prebent applicitas quoque

Ludi sorte feras Iona plurimas,

Que donaria publica

Nomen ducta trahunt Ionio mari.

45

Panthere, tygrides, leo,

Campos innumeri sanguine Martios

Pardi, linx, aper inbuunt.

Insumunt hominum prelia bestie.

Id perpes faceret Deus!

50

Ludi parturiunt omne genus suum.

Totis rebus et artibus

Vrbs annum senii concelebrat sui.