Quis tutat gracilis te puer ut rosa,

Seclusum nitidis servat honoribus?

Casu mira sub arto

Plane dextra potens Dei,

5

Servarat placitum que David a truci

Regis Saul odio, dum ferus imminet,

Septo milibus antro

Parcit cui pius emulus.

Fusis irruerant allophili globis,

10

Vt predas agerent in regionibus.

Cogunt cive relicto

Sisti prelia publica.

Sic testem Deus hunc continuit suum,

Dum vir sanguineus cedibus imperat.

15

Plures undique motus

Tunc res publica pertulit.

Fervet belligeris seditionibus

Hostili graviter subdita principi,

Qui, dum nobilitat se,

20

Vexat Cesareum genus.

Primores odiis fulminat igneis,

Fedo more ferox invidet omnibus,

Preferri sibi posse

Quos formidat, eos premit.

25

Natus Pannonie finibus ultimis

Civis Dalmatici limitis hic erat,

Romanam pietatem

Nescit barbarus insolens.

Multis obpositus namque potentibus,

30

Dum per magna furit, parvulus effugit,

Qui credens adolescit,

Clara nobilis indole.

Orbatus patre iam fratreque regibus

Vite lustra sue bis duo iunxerat

35

Septenos super annos,

Quos vivo patre duxerat.

Sex mutant eadem tempora cesares,

Regnandi vicibus quattuor editi.

Prima solus et ima,

40

Regnarunt mediis duo.

Mensem quindecimum Decius imperat,

Gallus sedecimum cum socio tenet,

Ter quinum Galienus

Annum cum patre ceperat,

45

Quo capto, quoniam katholicos premens

Bellis Arsacides imparibus petit,

Servans unicus arcem,

Pacem christicolis dedit.

Tandem barbaricis victor ab hostibus

50

Donatus statua Claudius aurea

Insectando fideles

Gessit sceptra biennio.