Late frequens in orbe fama martyris

E Francie terris trahebat exteris

Aran episcopum, videret ut locum.

Abbas habebat cognitum prius virum,

5

Ob hoc eum reviserat libentius,

Amicus alter alterum sciens ovat.

Antistes ossa martyris dari rogat.

Abbas ait: "Mausoleo reclusa sunt,

Nec deforis quicquam remansit uspiam.

10

Si partiendum quippiam resederit,

In limina cenobio videbimus,

Vbi tenetur portio recondita

Ex martyris delapsa sola corpore,

Ne deforet pignus sui fidelibus."

15

Hec dixerant uterque, nec moras agunt.

Ad Ilmine locum citi se transferunt,

Evo graves requisiere clericos,

Vbi foret pignus sacrum reconditum,

Quod unicum martyr reliquit integer.

20

Illi sibi sacram dedere capsulam,

Cum qua secus tumbam sedent Arsacii,

Qui preminet patronus ipsius loci,

Dum panderent capsam brevemque tollerent

Ibi recondite salutis indicem.

25

Vix nomen illic martyris relegerant,

Et mens eos lumenque visuum fugit.

Tantum sibi vires manentve sensus,

Vt obditam capsam cito reponerent.

Solo ruunt iacentque supplices diu,

30

Fletu petendo gratiam reatibus

Placant Deum diutinis precatibus.

Tandem prior redit vigor cum visibus.

Auferre venerant loco sacrum decus,

Gratum tenent, quod non sibi perit salus.

35

Vbique martyrem regressi predicant,

Potentia qui preminens et gratia

Audaciam premit levatque supplices.