Victrices aquile renovant decus urbis herile,

Que nituere procul

Civibus ereptam predam pandendo receptam

Leticia celebri.

5

Nempe ferunt dignum placito positum sibi signum,

Dum bello redeant,

Vt candens labarum revehat victoria clarum

Aut fuga det roseum.

Eminus ergo globum dum signum prodidit album,

10

Vrbs avet ac patria.

Pontificem comitata ruit plebs conglomerata

Obvia principibus.

Clerus preterea recinit cum laude trophea,

Suscipiens proceres

15

Depredatorum salvatores populorum

Atque patres patrie.

Quos acies plene circum visuntur amene,

Nullus abest numero.

Dum cuneis totis prope deciderit fetus hostis,

20

Nemo sub his periit

Milicie ducibus, non armatus neque nudus,

Nemo pedes vel eques.

Oblectat cives laudum victoria dives,

Que dabat incolomes

25

Victores cum re capta sine clade redire

Auspice sorte ducum.

Quapropter letus numerat cum presule cetus

Premia summa viris.

Iura tenenda senatus eis tribuit dominatus

30

Omnibus in spoliis.

Id sibi, dum laudat, sententia publica mandat,

Vt pie suscipiant.

Qui contra responsa dederunt religiosa

Digna probis ducibus

35

Non terrenarum propter lucra divitiarum

Se neque pro spoliis

Sponte domos liquisse suas, peregrina petisse,

Res hominesque suos

Non dubie voluisse vie facili tribuisse

40

Deciduas ob opes,

Cum patria tellure peramplo predia rure

Plurima possideant,

Sed, quibus esset honos, sibi perquisisse patronos,

Quos et adhuc cupiant

45

Heredesque suarum poscant divitiarum

Perpetuo heri.

Presul ut hec audit, promissis promptior addit

Munus honorificum.

Libera tumbarum datur optio grata sacrarum

50

Preter apostolicas.