Brachio languens mulier fidelis

A sua poscit domina licere,

Vt comes vadat populo meanti

Ad sepulchrum martyris ob medelam.

5

Denegabatur sibi, quod petebat,

Et minis compellitur ad laborem;

Altera que luce rogando perstat,

Impeditam se referens dolore

Brachii nil posse laboris usu

10

Idque persuasum sibi spe medele,

Quod Dei martyr det opem precanti.

Circulum de pane sibi pararat,

Ouem volebat scilicet offerendum

Mysticum sacris dare brachiale,

15

Vt dolorem munere prodidisset.

Hunc manu gestans dominam rogabat,

Gratie ne claudat iter petende.

Ira demum maior heram subibat

Ac iubet discedere seva vernam,

20

Desidem culpans operis remissi.

Circulum voti rapit efferata,

Quem videt frangens madidum cruore,

Et stupens cedit precibus petentis.

Vota portat femina iam cruenta.

25

Fama velox mira vehit peracta.

Turba pagis proruit e propinquis,

Que viam preter numerum frequentans

Ducit egram previa vel secuta.

Ad sacram tumbam volat ante rumor,

30

Inde rumoris venit ipsa causa.

Intrat edem femina gratiosam,

Vota contestata Deo volente

Ponit are sanguinolenta dona,

Brachium cui debile convalescit.

35

Hinc Deo laudes resonant caterve

Gaudio dulci lacrimando passim.

Panis Altenses retulere fragmen

Hospites pro teste domum regressi,

Gratie quo dona probare possent

40

Seculi laudanda per omne tempus.