Infirmitate pressa perenniter

Primis ab annis femina debilis,

Delata passim per loca plurima

Nullum levamen languida senserat.

5

Plebana perstat basilice domus,

Ab Affrico que proxima terminat

Possessionem martyris incliti,

Parrochiam qui continet alteram.

Sed illa sedi subdita presulis,

10

Quam monte Babe rex pius edidit

Ac regalium compsit opum bonis,

Vetus reservat nomen Hagaria.

Ab huius isti plebe genus fuit

Paupercule, que strata fovens diu

15

Frustraque sacra circuiens loca

Edem Quirini viderat ultimo.

Hec colle supra Danubium sita

Plebes regit, cui Cella vocabulum.

Eo propinquis illa ferentibus

20

Delata supplex in quadragesima

Iacebat, orans vota Deo dabat,

Vt sanitatis munia redderet,

Ligata morbis menbra resolveret

Ac debitis hec officiis daret.

25

Iam sabbato dum missa peredita

Moneret addi rite synaxeon,

Cui vesper affert nomen in ordine,

Se dirigebat clinica lectulo

Primumque fessi singula corporis

30

Sic menbra sensim tendere ceperat,

Vt sana tandem surgeret eminus

Mirando turbis illacrimantibus.

Divina clerus carmina concinit.

Sonant Quirinum cantica plebium.

35

Devocionis gaudia dulcia

Fletu remiscent organa cantuum.