Compta magnificentius,

Septa militibus suis,

Optima facie quoque

Preminens hera venerat

5

Martyris celebri die.

Ingredi cupiens sacras

Illa cum populo fores

Impedita repellitur.

Vis superna tenens eam

10

Introire vetat ream,

Que putans, quod in hoc sibi

Preter obvia crimina

Sexus obfuerit minor,

Inter agmina plebium

15

Fortius reprimentium

Se gerens sine viribus

Temptat, addita pluribus.

Ianuas patulas adit,

Obstat alma potentia

20

Denegans aditum sibi.

Quam levant humeris viri

Ac ferunt aditum prope

Nec valent sub eo levi

Fasce limina transgredi.

25

Clara lumina cerei

In manu tulit utraque,

Sed nec his meruit tamen

Compos esse sacri loci.

Que pudore magis dolens

30

Optat hospicio foras

Anxiata recedere.

Fixa perstitit ut petra,

Nec movere valens gradum

Ante sive retro suum.

35

Mesta presbiterum vocat

Confitens sua crimina.

Rursus appetit ingredi

Lumen in manibus ferens

Nec sinit Deitas eam

40

Sacra limina transgredi.

Confitens iterum probat

Cereos pariter gerens,

An sibi pateant fores:

Arcet hanc aditus patens.

45

Tertio studiosius

Confitetur et accipit

Post flagella salubria

Penitens humilem modum.

Vestis ambiciosior,

50

Stricta seu camisilia

Anulique monilia

Spreta sunt simul omnia,

Lanea tunica tegit

Menbra, que male foverat,

55

Ausa nudipedalia

Rite solvere munia.

Vovit omnia denique

Sponte crimina tergere.

Vix abhinc meruit sacri

60

Particeps fieri loci.

Flens Deum populus timet,

Quisque criminibus reus

Pertimescere ceperat

Scita iudicis intimi.

65

Inde gloria martyri

Singularis et ardua

Ac sacro timor in loco

Crevit et reverentia.

Disciplina potentior

70

Nobili data femine,

Clara forma modestie

Fit scienda fidelibus.