Danubius fluviis datus rex

Fert ratibus decies duces sex

Septifidusque Thetim coronat.

Illius in gremio Quirinus

5

Sevit agros prius obsequentes,

Fagus habet locus is notamen.

Ecclesias spolians tyrannus

Hec tulerat bona, dans habenda

Imbripolis comiti potenter.

10

Que noviter comes urbis dux

Vt proprii dedit arva iuris

Rus placitum sibi cambiendo.

Hinc vetus hic ager est receptus

In tua iura, sacer Georgi,

15

Cenobio tibi dedicato.

Ecclesiam prior hoc patronus

Rure piam miseris habebat

Ac populo celebrem fideli.

Perdita qui cupiunt rescire,

20

Hactenus huc veniunt precantes,

Vota ferunt nichil hesitantes,

Quin triduo capiant abacto

Cercius indicium suorum

Aut procul aut prope perditorum.

25

Curtis holus nimium peribat

Et vacuum remanebat arvum

Pure domi cumulante porrum.

Econumus sua vota tandem

Ad tua sacra, Quirine, defert

30

Limina, conqueritur rapinam.

Cercior inde silet querelam.

Tercia lux venit et repente

Fur aderat male rapta gestans,

Omne rei facinus fatetur,

35

Reddidit integra, que tulisset,

Nam nec in usibus hec redegit.

Preterea retulit patenter

Martyre durius imminente

Talia se mala pertulisse,

40

Vt, sibi vita comes futura

Dum maneat, nichil ex Quirini

Rebus eum libuisset ultra.