Translationis annue frequentes

Dum plebium caterve festa densant,

Pauper fidelis offerenda misit

Tumba tua, Quirine, vota panis.

5

Quod munus infidelitas ferentis

Maligna subprimit Deo nec offert;

Reservat id viatico revertens.

Vindicta non reliquit acta fraudis,

Dat ex rapina martyr acta laudis,

10

Raptum Deo reis usum negabat.

Via reversionis exeunt

Et hora prandii monet cibari.

Panis reservati scelus reposcunt,

Vt hinc eis refectio iuvetur,

15

Quem protinus factum petram probarunt.

Cultro secandus artat hic acumen,

<N>on sectionis preferens notamen.

Perversitas confunditur frequenter

Et hii, suum dum pervident reatum,

20

Ex hoc Deo non deferunt honorem,

Sed indicem mali petram reiectam

In publica linquunt via fugaces.

Eam fidelis atque nobilis vir,

Cuius fuit domus vie propinqua,

25

Agro suo levaverat repertam

Et, quamdiu suis frui volebat,

Hanc pluribus monstraverat reservans.

Post seculo renuntians caduco

Et artiore se vita Deo dans

30

Geste rei verax manet relator,

In laude promptus martyris verendi,

Per secla canticis novis canendi.