Abbas prefuit Arbo, stridens limine cardo,

Dum gemitus populi capiens fert commoda nulli.

Quo valuit nisu, miseros hic fovit ab ausu

Prememorato, censor ubi sua, vult sua questor,

5

Qui sibimet legem sanxerunt rodere plebem.

Dat comitis mire fraus istum cesaris ire

Consiliorum tegna penis conficienda,

Qua dederat tandem tantam vis regia cladem,

Dum locus hic stabit, quod eam non exsuperabit.

10

Rex Latio rediens Heinricus, previa mittens

Summis nuntia claustri, iussit prandia mitti

Per fluvii valles Eni, quo fert via calles,

Si cui Norica tellus post Latium petitur rus.

Mons ibi celsus honori te dat, magne Georgi.

15

Illic cesaris alis pausant agmina lassis.

Ipse prior sacre rex offert martyris are,

Huc reverens ordo proceres fert non sine dono.

Re tenuis qui tunc locus, ipse viget melior nunc,

Christi milite clarum quem flos miliciarum

20

Cum populis ambit, sollers quem munere comit.

Arta manet sedes, medicans hic queritur edes

Tanti nomine sancti, si qui clade coacti

Seu febribus tacti spem poscant anxietati.

Quem titulum donis abiens rex auxit et agris.

25

Plaustris congrua mandans illuc miserat abbas

Serviciorum xenia, sed tutor vafer illa

Astu verterat acri, suadens non ea tradi,

Ceu fuerit fallax de cesare nuntia portans,

Que melius noscens post mittat munera prudens.

30

His retinet verbis mens callida munia regis,

Tradit crimine victum spreti principis istum,

Crebro qui sibi plebis causa nomine regis

Ius minitans questus interdum solverat eius.

Sic graviter frustra prestolans non sibi missa,

35

Rex nimium neglecta re motus ferit acta

Digno verbere, culpis instans durius ultis.

Poscit curia missis ambos regia scriptis.

Actor scilicet ac consultor pellitur illac,

Qua procerum turme Ratispone glomerant se.

40

Abbas plectitur eris dampnis, tutor honoris;

Iste quater geminas templi de sede coronas,

Quas solidas flavo necnon ars fecerat albo,

Ebdamadarum sex pastu dat, sic adigit rex;

Ille parat, fasces sumptos Otto gerat ingens,

45

Vir generis clari, quem restat commemorari.