Ecce pari pariterque pari parium quoque primo

      Perfecto trino de paritate pari,

Imparium primo numero paribus sociato

      Impariter paribus uersibus addo parem.

5

Caudam menbratim per singula diuide quarti

      Diuisim capita quatuor una dabit.

Immo quater terna uel ter reperire quaterna

      Ter tria multiplica, quatuor adde, potes.

Hi quid contineant in se numeri, quid adumbrent

10

      Propositum non est hoc reserare loco.

Sed quocumque modo uarientur, multiplicentur.

      Tu sine mensura, semper ubique uale.

Quis tamen hoc poterit lacrimarum ualle ualere?

      Hic ubi cura, dolor ipsaque regna tenent?

15

Hic ubi conceptus culpam, penam parat ortus,

      Mestitiam uita, meror at inde necem.

Hic ubi uiuendi maculat primordia fletus

      Occupat extrema, luctus amara cohors.

Hic ubi diuitie fallaces, gloria mendax

20

      Gratia deceptrix, absque salute salus.

Hic ubi deformis speres, ingloria uirtus

      Infirme uires, absque decore decus,

Hic ubi uita labor, uia lapsus, honor cruciatus

      Pena potentatus, fictio uultus amor.

25

Hic ubi prelatus timet hos quibus ipse timori est.

      Hic ubi cura preest anxietasque subest.

Hic ubi nobilitas seruo seruire probatur

      Et falsis uera cedere, iusta dolus.

Hic ubi plus nummus quam iustus, plus placet aurum

30

      Quam uerum, quam fas plus ualet eris amor.

Hic ubi dira fames epulas, sitis anxia potum

      Pauperies sequitur quas habet orbis opes.

Hic ubi plus lacrimas risum, post gaudia planctum

      Post belli motum tempora pacis habes.

35

Hic ubi cunctarum stabilis mutatio rerum

      Omnia nature mobilis esse docet.

Vera tibi fateor, frater dulcissime, finem

      Me rebar scriptis imposuisse meis.

Dum penam tingo, dum de te cogito, scribo,

40

      Sentio principium me reperire nouum,

Ordirerque nouam nisi ferret tedia telam.

      Tedia tela licet non ferat ista tibi.

Sic reor et forte fallor, nisi uerba probandi

      Argumenta darent, ore relata tuo.

45

Non fallor, te fallit amor potius, pietatis

      Intuitu. Mea sint qualiacumque placent;

Non tamen ipsa placent michi, non nego; nempe placere

      Te michi subtracto talia nulla queunt.

Dumque tuis parere, paro dulcissime iussis

50

      Scribo satisfacere taliter usque uolens,

Sed prohibet noua lex arcetque manum nec habenas

      Laxat, rectoris dura potensque manus.

Postremo liceat michi respirare parumper

      Dum mens ypocoans ilia ducit equus.

55

Turgentique ratem liceat subducere ponto

      Dum detur uelo gratior aura meo.

Carbasa subsidiant tandem cum remige fesso

      In portu sileat quassa carina tuo.

Rursus iterque uale, sit finis et hic sine fine

60

      Hic sit et absque mora rursus iterque uale.