"Olim, quando iuvencula",

Dixit sponsa, "virens eram,

Tunc querebar ego placens,

Et tunc pro foribus meis

5

Sponsi pulsus erat frequens.

Carus tunc thalamus meus.

At nunc, quando senilibus

Annis primus abit nitor,

Effetum quoniam meum

10

Laxe corpus arant rugae:

Clausum non resonat meum

Totis noctibus ostium.

Incesti tamen obsident

Nostrum limen adulteri.

15

His necdum videor vetus,

His multum videor nitens.

Sed non his resero fores,

Et conservo tibi fidem.

Ipsi vero licentius

20

Conquassant viduam domum,

Tot fortes quia regium

Non servant modo lectulum,

Nec, si sunt vigiles, habent

Accinctum gladio femur.

25

O si nunc venias semel!

Sim fecunda minus licet,

Noster lectus adhuc tamen

Sanis fraglat odoribus;

In quo candida lilia

30

Sunt, et cum violis rosae.

Cedrinamque retro domum

Hortus delitiosus est,

Vernans foribus aereis,

Exornatus aromatum,

35

Et pomis redolentibus

Arbor feta refringitur.

Nam quamvis glacies furit,

Non messis mea friguit,

Thus, et myrra, crocus, cyprus,

40

Nardus, fistula, balsamum;

Necdum vinea fertilis

Amisit laticem suum.

Menbris preterea licet

Defectis rediet viror,

45

Cum tu sepe reviseris

Integre fidei thorum,

Et fecunda parens novam

Prolem parturiam tibi.

Sin vero nec adhuc venis,

50

Nec sponsam repetis tuam,

Laetabuntur adulteri,

Qui matrem miseram premunt

Infantesque tuos magis

Confusamque domum premunt".