1

Dum rutilans Pegasei

Choruscat aurum velleris,

Auricomi fauor dei

Risum serenat etheris.

Leta suos Dyonei

Salutat aura syderis;

Castra densantur Veneris,

Volant tela Cytherei.

Felicibus

Stipendiis

Suos Venus remunerat,

Dum lusibus

Et basiis

Medetur hiis, quos vulnerat.

2

Fastidiens rex Iunonem,

Non imperat lasciuie;

Suam Ianus Argionem

Bina miratur facie.

Et causatur in Plutonem

Ceres de raptu filie;

Vsum Mauors milicie

Suam vertit ad Dionem.

Felicibus

Stipendiis

Suos Venus remunerat,

Dum lusibus

Et basiis

Medetur hiis, quos vulnerat.

3

Miscet Venus venenata

Felle felici pocula,

Melle puer toxicata

Torquet alatus iacula.

Corda sanant sauciata

Lusus, amplexus, oscula.

Hiis me bearas, Florula,

Michi totum me furata.

Felicibus

Stipendiis

Suos Venus remunerat,

Dum lusibus

Et basiis

Medetur hiis, quos vulnerat.

4

Nobis yemps ver amenum

Nullo fuscata nubilo

Dum faueret sors ad plenum.

Set nobis nunc flat Aquilo.

Dum erumpit in venenum

Sinistro liuor sibilo,

Fame dampnatur iubilo

Nostre sortis ver serenum.

Felicibus

Stipendiis

Suos Venus remunerat,

Dum lusibus

Et basiis

Medetur hiis, quos vulnerat.

5

Viuat amor in ydea,

Ne diuulgetur opere.

Viuam tuus, viue mea,

Nec properemus temere!

Dabit adhuc Cytherea

Videre, loqui, ludere:

Nos pari iungat federe

Relacio Dionea.

Felicibus

Stipendiis

Suos Venus remunerat,

Dum lusibus

Et basiis

Medetur hiis, quos vulnerat.