Estiuali Clarius sublimatus rota

Estuat vicinius vi caloris tota.

Flamme vis alterius michi non ignota

Vrit me propinquius, licet plus remota.

Flammis volens ingeri minus vri sicio;

Minus vrar veteri traditus incendio.

Intimi profunditas estuat ardoris,

Vires agens tacitas nec apparens foris.

Mira flamme nouitas, noua vis caloris:

Minuit propinquitas flamme vim feruoris.

Flammis volens ingeri minus vri sicio;

Minus vrar veteri traditus incendio.

Egra mens absenciam sustinet inuita,

Sompnii per graciam plurimum lenita:

Reparat presenciam, volat expedita,

Exulat in patriam, corporis oblita.

Flammis volens ingeri minus vri sicio;

Minus vrar veteri traditus incendio.

Felix in exilium mens peregrinatur.

Sompni per obsequium misere beatur.

Nam dum sic colloquium virginis venatur,

Cassum sopor gaudium fugat, dum fugatur.

Flammis volens ingeri minus vri sicio;

Minus vrar veteri traditus incendio.

Carceris inpaciens, sui facta iuris,

Euolat mens nesciens cohiberi muris.

Sompniorum blandiens sibi coniecturis,

Ouat, spem concipiens letam de futuris.

Flammis volens ingeri minus vri sicio;

Minus vrar veteri traditus incendio.

Dulcibus mens sompniis languens recreatur.

Suis se deliciis frui contemplatur.

Verbis, risu, basiis vane gloriatur

Et sibi ficticiis lusibus nugatur.

Flammis volens ingeri minus vri sicio;

Minus vrar veteri traditus incendio.

O si sic euenerit! o si res futura

Sompno fidem dederit, o fatorum cura!

O si sic predixerit, que si<n>t euentura,

Mistica promiserit sompnii figura!

Flammis volens ingeri minus vri sicio;

Minus vrar veteri traditus incendio.

Regibus preuehere vel equare stellis,

Dulcibus eruere potest me procellis:

Si de labris carpere detur fauum mellis,

Os dilecte lambere roseam labellis.

Flammis volens ingeri minus vri sicio;

Minus vrar veteri traditus incendio.