Versus de differenciis

 

Dactile, quid latitas? Exi! Quid publica vitas?

Quis vetat audiri, que fas nec inutile sciri?

Non alios cura, nisi qui curant tua iura.

Ergo versifico - dic cuivis, que tibi dico.

5

Accipe, quas dichronas partes in carmine ponas,

Que confusa sono distincta vocabula pono.

In me, Serlonem, non respice sed racionem:

Si bene stat, sic sit; si non, quis non male dixit?

Vnam semper amo, cuius non solvor ab hamo.

10

Dicitur arbor acer, vir fortis et improbus acer.

Forma senilis anus, pars quedam corporis anus.

Porcum nutrit ara, gentilis eum necat ara.

Terram nullus aret, in qua spes seminis aret.

Ad quid pignus alis, o Dedale, quod caret alis?

15

"Nutrio" curtat alo, producit "spiritus" alo.

Dic pro vase batum, proprio pro nomine Batum.

Semper amore care, ne te careas, michi care.

Vilis sepe caro mea fit pro munere caro.

Vt sis celestis, non assimilare scelestis.

20

Dic, ut dico, cedo pro dic, pro supplico cedo.

Notus voce canis annosaque tempora canis.

Carmina, Naso, canis pueris bona, non bona canis.

Mus ait "antra cavi non arta cavans male cavi".

Venti quique chorum ducant: inibi pete Chorum.

25

Sic ego vina colo: lego, calco, gutture colo.

Pro veloce citus breviant, non de scio scitus.

Carne, canore, comis me fallit femina comis.

Docto crede duci, si vis ab eo bene duci.

Qui diis templa dicant, qui dii sint, hoc michi dicant.

30

Multis multa dedi, que non cuperem michi dedi.

Non tibi, Troia, dares famam, quam dat tibi Dares.

Centum ducenti cedunt quandoque ducenti.

Verbum curto, doma; longo, pro culmine, doma.

Taydis est, quod emo corpus prece, fletibus, emo.

35

Non et dignus equo, cui carior est equus equo.

Ne sis solus eques, tibi me per equum, precor, eques.

Eris servus eris, si te species trahit eris.

Cum dape vescor, edo; sermonem, cum loquor, edo.

Dico frequenter here "michi dic: michi noctibus here".

40

Intrat nauta fretum, ventorum turbine fretum.

Basia plena favi michi das - ideo tibi favi.

Non eget ille fide, cui mentis gratia fide.

Est sine fraude furor michi, si mea gaudia furor.

Prestat in ede focis iungi quam per mare focis.

45

Orpheu, nulla fidis tangit, quos tangere fidis.

Nil mage triste fame, valide nil comparo fame.

In te, Cace, furis - fraus cessat in Hercule furis.

Expers esse iugi Veneris nequeo prece iugi.

Si curamus idem, duo non sumus, immo vir idem.

50

Cum sit functus Ytis, quo vir, coniunx, soror itis?

Pollice tango lyram, facio cum vomere lyram.

Sic gaudere libet, ut amans mea gaudia libet.

Cum sit nemo "liber", qui non amat est homo liber.

Si tua scripta lego, lege scriptum, quod tibi lego.

55

Non decet illa legi, que sunt contraria legi.

Me gravat ille labor, pro cuius pondere labor.

Nil ego sponte levo, quod sit lateri grave levo.

Servat ab hoste latus artum clipeus michi latus.

Non honerosa levis res est, non aspera levis.

60

Qui rigat, ille lavit; qui mundavit, bene lavit.

Spuma sepe litus locus est, quem nomino litus.

Nevos sepe lini calido de semine lini.

Cum post vina labes, non vini sed tua labes.

Vt racione lites, animi prius excute lites.

65

Sic distingue: liquor pro fluxu, pro fluo liquor.

Mos me morosum, mora me facit esse morosum.

De Misus ede Misi, de mitto concipe misi.

In rate triste malum, cum frangit navita malum.

Non levitate mole sed aque currit rota mole.

70

Est in amore mori Veneris se subdere mori.

Sunt matura mora pira, ficus, amigdala, mora.

Care dico "mane", cum debeo surgere mane.

Me mea merentem faciunt mala plura merentem.

Grais Troia minans cecidit, non se bene minans.

75

Dux ibi, Pluto, manes, ubi terrent tristia Manes.

Cum tua rura metis, vicini parcito metis.

Clare, Phebe, mica - dabitur tibi cum sale mica.

Per mare tuta natas comitans Nerey, Teti, natas.

Cuius colla nolis resonant, hunc tangere nolis.

80

Hoc in amore noto, quod eo me nescio noto.

Non est tuta nisi sine Niso filia Nisi.

Sunt mea cura novi versus, quia talia novi.

82a

[Quamvis arte nates, tamen apparent tibi nates.]

83

Perflat summa Nothus, crebro michi flamine notus.

Est tibi, Thay, nitor, in quem super omnia nitor.

85

Res ea vilis ovis, que non melior tribus ovis.

85b

[Quidam dixit "ovis", ubi dicere debuit "ovis".]

86

Iupiter inquit "ovo, quia Tyndaris exit ab ovo".

Recia, regna plagas dicunt et vulnera plagas.

Non sine prole parens, non sum nisi pareo parens.

Non michi tolle pilum, ne te tollat tibi pilum.

90

Quando ministro penum, diadema parum probo Penum.

Ludum laudo pile, plus laudo pocula pile.

Rane cura palus, furis dampnacio palus.

Vitem propago - bibet inde futura propago.

Scorto nemo placet, nisi dextram munere placet.

95

Si potare potes vinum, cur flumina potes?

Credimus esse pedis strepitum - tu, turgide, pedis.

Vis tibi, lusce, peti te dici nomine Peti.

Absit ob illa queri, que noscis turpia queri.

Romule, parce Remo: caret ecce ratis tua remo.

100

Si bene regna regis, tu dignus nomine regis.

Vis est rudentis asini vi victa rudentis.

Quas tu dente rapis, comes est inflacio rapis.

Stultus si qua refert, que sint ea nil, puto, refert.

Ypodamia, redis victis cum Pelope redis.

105

Si far vere sero, crescunt michi semina sero.

Fur, obstante sera, non furta facit nisi sera.

Spernere pingue serum non me facies nisi serum.

Qui rem nosse soles, dic "solem", desine "soles".

Rebus securis est sepe minata securis.

110

Illis, si qua seres, dabis et byssum tibi Seres.

Tantale, cuncta sitis, "Mea" dicens "omnia sitis".

Implet mamma sinum lactisque coagula sinum.

Te, Mars, ferre sudes iuvat, ut per prelia sudes.

Pondera parva stipes, robur non fertile stipes.

115

Tu prees ore seni, cum sint anni tibi seni.

Dum super alta sedes, casum prodit tibi sedes.

Presens, crede, scabit; non preteritum breve, scabit.

Fixum pone solum breve, longum mobile solum.

Pro regione Tyro, pro forti milite tyro.

120

Serlo docetur uti non doctus amoribus uti.

Si transire velis maris undas, utere velis.

Ante fruere vadis per aquas, ubi dux michi vadis.

Me terret quod humor, non terret quod sonat humor.

123b

[Si quia vivus "humor" profert, non proferet "humor".]

124

O ver, quando venis, trahis e terre tima venis.

125

Ni stipe venires, quovis mage grata venires.

En venit hora: veni, mea! Tu venies, ego veni.

Non probitate vires, nisi sint animi tibi vires.

Silvis paste vagis, cum fratre tuo, Reme, vagis.

Glebas, unce, vomis - ideo nomen tibi vomis.

130

Si placeo nulli, quid nullo carius ulli?

Hic locus est mete: venit "explicit". Ergo valete.