1

Arvi polique creator inmense,

Qui tuum globum dimensus es palmo,

Tellurem cunctam pugillo concludis,

Fabe placatus.

2

Gnari nam probi praeinstruunt cunctos,

Constare nullum latibulum reo,

Quia tu testis et iudex ubique

Adesses ultor.

3

O deus sancte, depromunt examen

Nimis pavendum restare superbis,

Labentia quaeque atroci puniri

Acervitate.

4

Bibrant coruscae, iam sicca procumbit,

Tetrum puniri reatum prospectant,

Sed pius iudex leniri se monet

Actibus bonis.

5

Artor addictus larbalibus suasis

Horridae mortis in carcerem trusus,

Posco ne pandant clibani se fauces,

Me renitente.

6

Rumpe iam, quaeso, altitonans alme,

Nex pollinctoris convinxit me lege,

Adsis paratus et promptus ablutor,

O salutator.

7

Defluit vita et affluit noxa,

Noxae exactor pro foribus pulsat,

Vanam proritat, inlecebrat mentem

Male devinctam.

8

Opperit oram terribilem nimis,

Qua spiritus linquat carneam sedem,

Quem secum gestit abducere gaudens,

Eheu pro dolor!

9

Pectore in imo sic pavitans volvo

Necem: sodalis vel pronus amator,

Proximus parens vel karus germanus,

Opitulentur.

10

Arcent delicta scandere excelsa,

Animam foedam caelicolae spernunt,

Frigidam carnem odibilem effert

Karus superstes.

11

Xriste tu solus omnimoda ope

Viribus vitam et requie mortem

Robora, sensum et conplue rore

Aeternitatis.

12

Suscipe, pater, versiculos missos

Tibi, vocaris tu vero meorum

In versuum primis litteris: tuum

Lege iam nomen.

13

Tu ut in Christo valeas, obto

Fratresque ut sospitet, quaero deum:

Vt vos quiete fruatis aeternae

Lucis, exoro.

14

Tu quoque meis sic annue votis,

Vt me commendes christicolis notis,

Quis det, ut velit redemptor me celsus

Iungere suis.

15

Praestet hoc sanctus ingenitus auctor,

Geniti pater et prolis quoaevus,

Quibus non dispar spiritus constat

In saecula amen.