Te nova dampna vocant, Elegia: concipe fletum,

      Omnia flere iube nomine iussa tuo!

Plange dolore novo nova dampna! Sit ore tibi mens

      Absque modo tristi tristior absque modo.

5

Stantem non poteras, Robertum vise cadentem.

      Ille tibi dixit stans "cade", "stato" cadens.

Que sit causa, vide - dices: "Me causa doloris,

      Taliter ut moveam cuncta dolore, monet:

Audi, gens omnis! Merorem, pectora, vultum

10

      Voce, manu, lacrimis exprime, tunde, riga!

Plangite Robertum, miles, Glovernia, vates,

      Morte ducem, comitem philosophumque premi.

Miles, Alexandrum, plex, Marcum, clere, Maronem

      Flete simul cassi robore, iure, stilo.

15

Magni, maiorem lugete, probi, probiorem,

      Qui nulli, nullo parve minorve fuit;

Cuius fas habitus, cuius privatio non fas,

      Cui nichil absque modo preter amare modum.

Nil voluit nisi ius, nil contempsit nisi non ius -

20

      Ius caro, ius animus, ius homo totus erat.

Pax, humilis, Bellona, trucis, Victoria, mitis

      Vnius ad meritum tres stupuere triplex.

Norunt sat fortem, sat plenum satque benignum

      Ense, fide, donis hostis, amicus, inops.

25

Mens Salomonis ei, non crimen; posse Neronis,

      Non mens; non Paridis dedecus, imo decor.

Os Paridem, non mens, non etas Nestora sed mens

      Fecit eum, iuvenem forma, sophia senem.

Rex pater arma dedit, rex hostis cessit in armis -

30

      Illi preda, pater rex sua rexque suus.

Ergo viri summi senserunt summa ruinam:

      Sol prior erubuit solque secundus obit;

Aer, terra, polus, mare fulmine, motibus, igne,

      Turbine casuri signa dedere viri".

35

Appositurus eram, si nescioquis tacuisset:

      Corpus cisternam, spiritus astra petit.