Invide, parce tibi! Gravis es tibi, non michi; dum tu

      Queris obesse michi, plus tibi livor obest.

Te punis, non me; te vota terunt tua, non me;

      Te tibi, non michi me displicuisse facis.

5

Me, quia tu nichil es, nichil esse putas; quia nescis

      Esse probus, si quis est probus esse negas.

Mens aliquid, nichil os me nuntiat esse; tibi mens,

      Os aliis - quod habes mentis et oris - idem.

Os, animus moresque solent culpare tuum me,

10

      Me mordere meus, te lacerare tui.

Si fleo, tu rides; iterum si rideo, tu fles;

      Si male dico, placet; si bene, verba teris.

Auriculas, oculos si consona, si proba, ledunt

      Vel mea verba tuas vel mea facta tuos.

15

Invideant multi Serloni, Serlo nec uni,

      Dum presit multis Serlo, nec unus ei.

Dum livore premor, me tollit in ethera livor -

      Quippe quod esse negat livor, id esse probat.

Ni cesset livor, non cessabis miser esse.

20

      Ergo vel esto miser vel miserere tui!