Vt custos ortum, sol sidera, pastor ovile

      Liberat urtica, nube, furore lupi,

Sic ovis et pastor, sic verna paterque Robertus

      Arcuit invidia, fraude minisque gregem.

5

Pax intus, tutela foris, pater hic, ibi questor,

      Plus pius, immo ferus, plus ferus, immo pius.

Pacificis plus pace fuit, plus hostibus hoste;

      Pax illi probitas, dedecus hostis erat.

Exclusit claustro lites, inclusit amorem;

10

      Intro virtutes, crimina missa foris.

Prestitit obsequium mens ecclesie, caro menti,

      Mens pro carne nichil, nil sine mente caro.

Ornavit virtus animum, facundia linguam,

      Iuris amore suum, iure modoque suam.

15

Vir fame, non fama viro meruit placuisse;

      Non laus, sed laudis causa celebris erit.

Fortibus ac teneris aptavit religionem,

      In levitate gravis, in gravitate levans.

Ergo sub casu, quantus steterat, manifestat;

20

      Quam fuerit magnus, magna ruina docet.

Patre "Latimacum" viduatur, prole Duacum,

      Presidio monachi, preside religio.

Divisit natura virum, nam reddidit astris

      Mentem, corpus humo - munus utrique suum.