Nutante mundi cardine,

Marcente cultu fidei,

Qui reatus feminei

Sparso veneni semine,

Sol ortus est in tenebris,

Vt remotis illecebris

Spes reformetur venie.

Quos mortis scaturigine

Momordit pus vipereum,

Sanavit Christus oleum

Stillans de rosa virgine,

Dies illuxit tenebris

De fumo vel de latebris

† litantis historie.

De rosa vite balsamum,

De rosa ros elicitur,

Qui, si fide conficitur,

Celestem donat thalamum.

Vera vitis ecclesie,

Succus eukaristie

Prelo crucis exprimitur.

Iacob post lucem claudicat

Negans venisse filium,

Que<m> pleno cursu munerum

Austri regina predicat.

Percussa lepre macula

Legislatoris emula

Nunc in castra revertitur.