1

Orba suo pontifice

Tristatur Cantuaria.

O monstrum gentis Anglice

Scribendum in hystoria,

Quod stantem pro iusticia,

Quod viventem canonice

Martyrizavit publice

Tyranni violentia!

O regio

Digna res epithaphio!

2

Hec levis excusatio,

Quam pretendit ad populum:

"Dum osculum refugio,

Quod pacis est signaculum,

Proditionis iaculum

Nequaquam," inquit, "iacio",

Ac si non sit proditio,

Quod non precessit osculum!

O regio

Digna res epithaphio!

3

O quanto dignus fulmine

Vel qua Megera creditur!

Infausto natus omine,

Cui scelus hoc obicitur,

Rex abusive dicitur,

Qui totus est in sanguine,

Sic emutato nomine

Rex in tyrannum vertitur.

O regio

Digna res epithaphio!

4

In tota regum serie,

Quos habuit Britannia

Ab antiqua barbarie,

Que processit a Frigia,

Pollutus hac infamia

Numquam fuit rex Anglie,

In isto tribus regie

Degloriavit gloria.

O regio

Digna res epithaphio!

5

Vittas imbelles gerere

Licebat priscis vatibus

Et bellis non intendere,

Sacris sacratos usibus;

Sed nunc moris est regibus

In pace pacem solvere

Et suis pontificibus

Parcarum fila rumpere.

O regio

Digna res epithaphio!