Velificatur Athos, dubio mare ponte ligatur,

Remus arat colles, pedibus substernitur unda,

Puppe meatur humus, pelagi Thetis exuit usum.

Salmoneus fulmen iaculatur, Daedalus alas

5

Induit, ingenii furor instat, et invia praeceps

Rumpit, et artifici cedit natura labori.

Languida segnities, Veneris nutricia, tractat

Otia, dilatrix operum, dissuada laborum,

Venativa more vix inceptura, quod ipso

10

Principio rumpit, hodiernos crastinat actus,

Et quod praeteritum nunquam facit, usque futurat.

Ausus attenuat, animos premit, alligat artus,

Contemptusque luto defoedat, aromate morum

Pectus odoratum, fame secura, pudendae

15

Assuescit vitae, vitiique paludibus haerens

Sorde volutatur, oculoque improvida caeco.

Mentis ab excubiis expellit inhospita curas

Sollicitosque metus, currentibus urget habenam

Ingeniis, fixoque modo conamina sistit,

20

Torporisque iacet studii vigilantia somno.

Difficiles aditus, et quo luctamine prono

Nitendum est, odit, non invitata, labores

Laude coronanti, nec quo dulcescere sudor

Edidicit lucro, gladios in bella trahenti,

25

Facturoque leves freta tela, incendia, caedes.

Taedia segnitiem comitantur et invida laetis

Tristitiis, luxusque, vacans lascivia pompis,

Et Venus, et renum cinctus petulantia solvens,

Cognatusque necis sopor et praecursor inermis,

30

Torpor egestatis, et amara opprobria vultu

Moesta verecundo, salibusque irrisio mordens,

Et pudor, et partes infamia nuda pudendas,

Et vaga propositi levitas, et nescia fixis

Nobilitas mansisse rotis, et devius error,

35

Votorumque vices crebro inconstantia versans,

Et fluitans animus, et non statura voluntas,

Pigraque mollities, et inertia parca laboris,

Et fractus studii languor, morbusque senectae

Debilitas, sterilisque brevi sub pondere manans

40

Sudor, et abscissis titubans ignavia nervis.

At ne desidia musae mihi sopiat ignes,

Nascitur et puero vagit nova pagina versum,

Propositique labor victorem spondet, et audax

Grandibus inceptis studii constantia; verum

45

Inter Apollineas lauros, fas esto myricae

Deiectis vernare comis, non praecinit omnem

Ad digitum Phoebaea chelys, non novimus aures

Aonia mulcere lyra, non pectinis huius

In plebem vilescit apex, haec gloria vatum,

50

Hoc iubar, hic titulus, solos contingit Homeros.

Sufficiet, populo si suffecisse togato

Hic poterit nostrae tenuis succentus avenae.

In Croesi ne sudet opes privatus Amyclas,

Contentum proprio faciunt me tuta facultas

55

Angustique lares, modico me posse potentem

Metior ad multum, nec gutture rumpor anhelo

Sirenum insidias aequasse, et funus oloris,

Dum mea ieiuno mihi sibilet ore cicada.

Non ago praecipites sopire leonibus iras

60

Pectine, vel rigidos mores mollire ferarum.

Hoc precor, hoc satis est, si nostra haec arida plebis

Aure sono tenui ieiunia solvat arundo,

Incola mergus aquae madidis ne pervocet alis

Surgentes aquilas labentibus aethera pennis.

65

O mihi suspecta veterum mordacior aetas,

Acrius in iuvenes decorrosiva senectus,

Ne preme, sed pressa meritorum nomina tolle,

Quae male tondenti decerpit forcipe livor,

Dulcescat gravium maiestativa virorum

70

Lingua, nec invidiae fuso crudescat aceto.

Deucalioneum pelagus vel naufraga Pyrrhae

Saecula non vidi, vel quas solaribus ardens

Vector equis radio sitienti sorbuit undas.

Non me praeteritis iacto latuisse diebus,

75

Maeoniumque senem mihi convixisse, nec aevi

Lautius intitulor senioris laude, modernis

Maior, ab ignotis famae lucrosior annis.

Sustineat quod me dederint haec tempora, nec si

Videris auctorem pretio leviore libellum

80

Argue, nec si quem meruit deperdat honorem.

Non me limes Achium, non barbarus edidit Athlas;

Non apud Arcturi glaciem, solemque Sienes,

Advena spectandos ordiri glorior ortus,

Philosophum faciente loco, soloque verendum

85

Externi terrore loci, nodosa meretur

Nondum ruga coli, nondum veneranda senectae

Albet olore coma, non sum cui serviat auri

Turba, vel argenti, cui rerum copia mundo

Plaudat adulanti, cui servum purpura vatis

90

Accideret nomen, cuius facunda smaragdus

Disputet in digitis, vulgique adsibilet aures

Attonitas gemmis, liber est non libra Iohannes

Quod canit, et Cyrrhae modicum de fonte propinat;

Hisque magis Phoebus cyathis quam Bacchus inundat.

95

Ha! quod Alexander tetigit derisor Homeri,

Zoile, tu laudum cynicus, tu serra bonorum,

Magna doles, maiora notas, in maxima saevis;

Siste gradus solitos, odio tibi vapulo, libro

Parce, nec auctoris in opus iactura redundet.

100

Gloria Pergameae sepeliri gentis Achiva

Non potuit flamma, stetit occursante ruina

Indilapsus apex, pulsanti cedere fato

Non cecidisse tulit Danais fortuna caminis.

Excoxit non saeva Phryges, maioraque bellis

105

Erudiit perferre viros, et diruta maior

Stanti Troia fuit, non est incensa, sed igni

Vberius lucrata iubar, radiosque Pelasgae

Dardanios auxere faces, nec polluit illo

Sol Asiae fumo, fines augusta potestas

110

Indignata breves, iam fastidiverat Idae

Arctari plebeia iugis, mundique recessus

Occupat, et validis maiora supermeat ausis.

Plenior imperii Romanis Pergama pensat

Fascibus, et conto siquid de culmine fati

115

Diminuit livor, virtus reparavit, et orbi

Hic urbem rapuit, hic orbem reddidit urbi.

Prodiga, nec tandem niveis exhausta metallis,

Vtilium mater, dulcique puerpera gleba,

Absolvit Phrygiis affusa Britannia Graecos.

120

Immo Phryges Phrygius sanguis solatur, anhelos

Exhilarat luctus, quem derivavit Iuli

Postera maiestas, nostroque insplenduit aevo.

Nec nisi nobilium medios intexuit ortus

Ille Dei sedes, thalamus virtutis honesti,

125

Hortulus et morum, vitiis impervia, Tempe

Altera, quem nec hiems nec fervor marcidat, Hybla.

Ille procellosos innaufragus enatat annos;

Inferius flantem scelerum premit altior Austrum;

Nec mundi quatitur hac tempestate malorum,

130

Nubibus et ventis sublimior, alter Olympus

Surgit, et explicitos apices extendit in ortus;

Crescit, et in titulos maiores erigit Idam;

Fulget, et aureolo populatur sidere noctem;

Gaudet, et impluvium moeroris siccat, et imbres;

135

Vernat, et hiberna Galterus diluit, in quo

Florida Troianum redimit Cornubia damnum.

Vix tanti cyathum pelagi delibo, licebit

Solverer in quaevis commendativa, viroque

Impluerem laudes, nam morum praevolat alis

140

Curriculum laudis, solus capit omnia famae

Nomina, nec veris adventum percipit Aethnae

Gloria, nec crescit Phoebus face, mundus arena,

Secula momento, nimbo mare, linea puncto.

O cuius studio, quo remige, navigat aestu,

145

Mundanoque mari, tumidis exempta procellis,

Linconiae sedes, O quem non praeterit aequi

Calculus, O cuius morum redolentia caelum

Spondet, et esse nequit virtus altissima maior,

Indivisa minor, cuius se nomen et astris

150

Inserit, et famae lituo circumsonat orbem.

O quem Rotomagi sedes viduata maritum

Sperat, et aspirat, solidisque amplexibus ardet

Adstrinxisse virum, flagrantis odoribus uti,

Morum deliciis, virtutis aromate, sponsi

155

Pectore, quod Phoebum redolet, quod Nestora pingit.

Vere novo thalami floreri expectat, et illos

Ascendisse toros, ubi virtus pronuba, Christo

Auspice, sacrati et sacrae connubia firmet;

Optat ut arctois infusum manna Britannis

160

Cedat, et irriguum Normannis influat, urbis

Aridulae deserta rigans sitientia sacros

Linconiae fontes, et vix libata recentis

Gaudia prima favi, longum sperata, brevique

Degustata mora, revocat quem misit alumnum,

165

Depositumque petit, et quo videt Anglia reddi

Poscit, in occidui commissum luminis usum.

Virgo virum, matura toros, innupta maritum,

Orba patrem, mutilata caput, iactata salutem,

Caeca ducem, tenebrosa iubar, nocturna lucernam

170

Exigit, et quaeritur tardanti mane suumque

Eclypsata sitit rediturum Cynthia Phoebum.

O mihi Maecenas operis, tractique laboris

Expectata quies, rudis indubitata Minervae

Spes, adhibe coeptis oculi mentisque favorem.

175

O qui secretas hominum metiris habenas,

Et numero claudis dubium monstrantia fatum

Sidera, qui nosti mundi ne intermina surgat

Area, nec Stygiae noctis latuere recessus,

Et solus solisque modum lunaeque meatum

180

Scis, Deus, et celas incauto iudice visu

Astrorum excursus, fallitque et fallitur idem

Aethereae venans oculus secreta Minervae.

O divum Deitas, nusquam deflexa, superni

Linea consilii, divinae pagina mentis,

185

Qua nec desit apex, nec iota superfluat una,

Singula complectens quae dispertita quotannis

Evolvit series, nulli mutanda sororum;

Cui Clotho, Lachesis, deservit, et Atropos, illa

Stamina dispensans, fusis vitalibus, illa

190

Fila trahens operi donec concluserit illa.

O Cyrrhae latices nostrae, Deus, implue menti;

Eloquii rorem siccis infunde labellis,

Distillaque favos, quos necdum Tagus arenis

Palleat, aut sitiat admotis Tantalus undis,

195

Horreat insipidos aetas, vel livor amaros;

Dirige quod timida praesumpsit dextera, dextram

Audacem pavidamque iuva, tu mentis habenam

Fervoremque rege, quicquid dictaverit ori

Spiritus aridior, oleum suffunde favoris.

200

Tu patris es verbum, tu mens, tu dextera, verbum

Expediat verbum, mens mentem, dextera dextram.

Hoc etiam votum facili bonitate secunda,

Hoc nostris superadde bonis, ne transeat illud

Ad limam livoris opus, ne sentiat illam

205

Iudicii formam qua cancellatur honestum,

Suppletur vitium, quae verba decentia radit,

Turpia subscribit, quae praestantissima scalpro

Mordet, et omne bonum legit indignante labello.

Dulcius expectat examen pagina, iustas

210

Pro vitiis latura notas, habituraque nomen

Pro meritis, laudisque vicem si forte venusto

Quid ferat auditu dignum punctoque favoris.

Sit procul invidiae suspecta novacula, solis

Ingeniosa dolis, procul haec sit vipera, nullo

215

Corruptura nisi rerum momenta veneno.

Dumescente pilis facie, radioque iuventae

Obscuris pallente genis, cum mala viriles

Exacuit nemorosa rubos, nec primula mento

Vellera mollescunt, virides quot luserit annos

220

Respicit, et quicquid tenero persuaserit aetas

Floridior recolit; memor Architrenius imas

Pectoris evolvit latebras, mersosque profunda

Explorat sub mente lares, nec moribus usquam

Invenit esse locum, nec se virtutibus unum

225

Impendisse diem; "Mene istos," inquit, "in usus

Enixa est Natura parens? me misit ut arma

In superos damnata feram, divumque reatus

Irritent odium? leges et iura, meique

Praeteream decreta Iovis? vitiine potestas

230

Mortales aeterna premit? facinusne redundat

Diis invisa palus? mater quid pignora tantae

Destituit labi, nec quem produxit alumno.

Excubat, ut nullis maculam scelus inspuet actis?"

Illud enim supraque potest, nullaque magistras

235

Non habet arte manus, neque summa potentia certo

Fine coarctatur, astrorum flammeat orbes

Igne, rotat coelos, discursibus aera rumpit.

Mollit aquae sphaeram, telluris pondera durat,

Flore coronat humum, gemmasque inviscerat undis,

240

Phoebificans auras stellas intexit Olympo.

Natura est quodcumque vides, incudibus illa

Fabricat omniparis quidvis operaria nutu

Construit, eventusque novi miracula spargit.

Illa potest rerum solitos avertere cursus;

245

Enormesque serit monstrorum prodiga formas,

Gignendique stylum variat, partuque timendo

Lineat anomalos larvosa puerpera vultus.

Mascula Gracchorum tribuit gestamina matri,

Malleolosque ferens duplici cum folle viriles

250

Coniectura fuit gemini Cornelia sexus.

Nubit Aristonie mulier; modo nubitur illi,

Permutatque toros, ea vir modo, foedere foedus.

Rumpit, et efficitur illa ille, marita maritus,

Passaque tritorem rursus terit area, ducit

255

Foemina, sulcus arat, fodit hortus, malleat incus.

Curio natales armato dentibus ore

Exiit in luctus, acuit pro dentibus ossis

Continui massam Prusiae filius, ossa

Ligdamus extensis habuit concreta medullis,

260

Qui tulit ad Siculos, victoris praemia laurum,

Quam dedit Herculei ludi spectator Olympus.

Aethiopum naso facies non surgit, et oris

Planitie strata, non delibantur odores

Naribus, aut cerebrum lacrymosa foramina purgant.

265

Sunt quibus excludit linguae iactura susurros,

Eloquiique vices digiti facundia tractat;

Interpresque manus animi secreta retexens,

Obsequium vocis signis affabilis aequat,

Et tacite rixans imitatur garrula lites.

270

Sunt quibus ora brevi coeunt obnoxia rimae,

Qua bibulis stomacho cibus inspiratur avenis,

Vixque trahit cannis extorta liquamina Maurus,

Quem dapis irrigua mediatrix lactat arundo,

Dum calami rores angusta mamillula plorat.

275

In pede bis binos digitos duplat accola Nilo.

Est quoque monoculo vultu contentus, et uno

Crure potens cursus, plantam resupinat ad ignes

Solis, et erecti spatio pedis efficit umbram.

Gens Lybiae vicina carens cervicibus, inter

280

Supremos humeros oculorum concavat orbes.

Sunt qui bis binis pedibus, sunt qui ore canino

Degenerant, homines specie, sed monstra figuris.

Est cui cana comam puerilis liliat aetas;

Maturusque putrem vetulam delileat annus.

285

Staturam cubitis septem distendit Orestes,

Bis senis Phrygios potuit movisse, ruentis

Gomagog arduitas Corinei fracta lacertis.

In bis quinque pedes produxit Galbanus artus;

Aucta ter undenis cubitis mensura Metellum

290

Terruit, et Flacci tenuit mirantis ocellos

Corporis humani plus quam Titania moles.

Gens Scytha spectatu geminis oculata pupillis

Laedit, et irata Bythia quocunque rotatur

Enecat intuitus, oculis inserpit inurens

295

Ira, peremptivi radiis interfica visus.

Non est passa levi Crassum mollescere risu,

Antoniam Drusi sordente madescere sputo,

Fumida Pomponii solvi ructatibus ora,

Fulmine fortunae Socratis pallescere vultus,

300

Aut miseris lethos rigidum flexisse tenorem.

Felices, et pene dei, quos educat aura

Quam pomi praemellit odor, flagrantia genti

Panis agit potusque vices, hic Bacchus in aevis

Est cyathis, haec corbe Ceres, sic Gangis alumno

305

Vivitur, et redimunt oris ieiunia nares.

Non effusa gulae, non ventris rabida luxu

Natio, nec sordet utero, nec gutture peccat.

Duritia Psyllum sic loricavit, ut atris

Integer eludat pugnantes morsibus angues,

310

Solaque pro muri cutis est insaucia vallo,

Parma veneniferis iaculis impervia dentis.

At me pestiferis aliis exponit inermem

Anguibus, et tortis vitiorum deteror Hydris.

Non mihi pacifico nudum latus asperat ense,

315

Non chalybum plumis loricae retia nodat,

Non surgente caput animosum casside cristat,

Non clipeis telis obtundit moenia, nec quos

Det natura timent scelerum Stymphalidis arcus,

Nec furtim laesura nefas deterret arundo.

320

"Quid faciam novi, profugo natura per orbem

Est quaerenda mihi; veniam quamcunque remotos

Abscondat secreta lares, odiique latentes

Eliciam causas, et rupti forsan amoris

Restituam nodos, adero, pacemque dolorum

325

Compassiva feret, et subsidiosa roganti

Indulgebit opem, flecti patietur, anhelas

Hauriet aure preces, et mentis verba medullis

Blanditiva bibet, lacrymisque pluentibus udas

Siccabit mansueta genas, ad vota parentem

330

Filius inducet, spes solativa timorem

Eiicet, et coeptis favet, et temptasse repulsa

Nil metuit peius, ibo properantius, ibo

Ocius, et quae sit miseris fortuna videbo."

Rumpitur ergo morae sterilis dilatio, coeptum

335

Promovet, urget opus, mundi circumeat axes,

Et pede sollicito terit Architrenius orbem.

Montibus insudat, metit aegro poplite valles,

Languet in abruptis, in planos praevolat auras;

Ardua morbificant, relevant devexa laborem;

340

Sicca pedum curru, manuum legit humida remo,

Sese naviculae, sese vice remigis utens,

Nec suspendit iter, scopulos si planta queratur,

Crura rubus fodiat, faciem ramalia caedant,

Dumus aret vultus, Boreae furor ora flagellet,

345

Ardeat ad radios cutis, extinguatur ad imbres;

Sub Phoebo sitiat, pluviis adaquetur amictus;

Saeviat aut aestus, aut frigoris ira, caputque

Alba ligustret hiems, nigra quod vaccinet aestas,

Et faciem sol Maurum faciat, nive bruma Britannum.

350

Iamque fatigato Veneris domus aurea, rerum

Flosculus, occurrit, monti superedita, qualem

Cantat odorifero Philomena poetica versu.

Quae quibus intorsit odii certamina livor

Ruffinum vitiis, Stiliconem moribus, armat,

355

Alternansque stylos, istum premit, erigit illum;

Neutrum describit, tacet ambos, fingit utrumque.

Hic dea virginibus roseum cingentibus orbem

Praesidet, et rudibus legit incentiva puellis;

Inque viros faculas accendit, et implicat hamos.

360

Ex quibus una loci specie pictura coruscat,

Stelligero vultu, plusquam Ledaea, Dione

Altera, quae lunam maiori prevenit astro,

Et quam subradiat Phoebi minus aemula Phoebe.

Verticis erecta moderatum circinat orbem

365

Spherula, nec temere sinuato deviat arcu.

Non obliqua means, ubi nec tumor advena surgit,

Nec valle peregrina sedet, lascivit in auro

Indigena crinis, nec mendicatur alumnus.

Pyxidis exter honos, nec nubit adultera fictae

370

Lucis imago comae; non exulat arte capilli

Vmbra, nec aurifero ferrum sepelitur amictu.

Haec capitis pretiosa seges, nec densior aequo

Luxuriat, iuncto descensu prona, nec errat

Limite turbato, nec divertendo vagatur,

375

Transfuga nec cedit alio pulsante capillus.

A frontis medio tractu directa superne

Verticis ad centrum, via lactea surgit, aranti

Pectine, cuius acu geminas discessit in alas,

Et tandem trifidum coma cancellatur in orbem,

380

Divisoque prius iterum coit agmine crinis.

Liber apex frontis nitidum limante iuventa

Tenditur in planum, trito radiosa politu

Et bysso, quo prima cutem vestiverat aetas

Candida, nec maculae naevo nubescit, oloris

385

Aemula; nec recipit vaccinia mixta ligustris.

Qua propior naso frons ultima vergit, aperto

Parvula planities spatio nudatur; utrinque

Luna supercilii tenui succingitur arcu,

Nec coeunt medio distincta volumina fine,

390

Gratius alternos prohibent divortia tractus,

Communisque rubo via non silvescit, eamque

Non operit mentis pilus accusator amarae,

Nec clausi loquitur fellis nemorosa venenum.

Tortilis auriculae nodosaque cellula girum

395

Explicat, et tornata brevem complectitur orbem;

Mundaque naturae digito purgata, latenti

Nusquam sorde rudis, scabros inculta recessus

Erubuisse nequit, verborum semita, planum

Libera sternit iter, fructicoso calle, lutosis

400

Non odiosa viis; susceptam nuntia menti

Portatura notam, vocisque domuncula cuivis,

Semper aperta sono tersisque penatibus hospes

Murmura, vel timidos non exclusura susurros.

Excubiae lampas faculis ignescit ocellus

405

Sidereis, in quo saphyri flammata diescit

Gemmula, quam rutili mediam circumligat auri

Torquis, ad extremos tractus ardente beryllo.

Prima pudicitiae testis mansuescit ocelli

Simplicitas, mentisque foris iuratur honestas,

410

Promittitque fides oculi sincera Sabinam.

Egreditur nasi brevitas producta, magistro

Permittente modo, quo praecurrente tumentis

Ardua colliculi non dedecet aggere turpes

Excursus aquila nescit vel sima recursus.

415

Dirigitur iusto spatio librata, venuste

Tracta, nec alterutro declinans regula nasum,

Non procul extendit, refugove reciprocat arcu.

Naris odoratae redolet thymus, intimus extra

Non celatur honos, gemino dulcescit aroma

420

Thuribulo spirans, laetum flagrantia spargit

Aera vicinaeque lares imbalsamat aurae,

Et vacuos implent absentia cinnama tractus.

Non ibi lascivus riget importuna pilorum

Silvula, nec naris tenui crinitur arista

425

Munda, nec interius rudibus dumosa capillis.

Ebriat aspectus animum, cibat omne tuentis

Delicium facies et praedo cupidinis hamo

Piscatura viros; haec Nestoris esse timori

Iam gelidis annis, haec sollicitasse Catonem

430

Retia, vel laquei, vel pulmentaria possent.

Hic color exultat placituro sedulus ori

Incola flamma rosae, quam circumfusa coronant

Lilia, candentes vultus accendit, et ignes

Temperat, et parcit faculis, et amicius urit

435

Blandior extremi fusa nive purpura limbi.

Haec rosa sub senio nondum brumescit, et oris

Hic tener in teneris puerisque puellulus annis

Flosculus invitat oculos, et cogit amorem

Mentibus illabi stupidis; Venerique ministrat

440

Arma suasque faces, limatque cupidinis arcum

Pectoris in vulnus, glacie contracta senectae.

Non ibi languet hiems, illuc inserpere ruga

Non praesumit anus, subito circumvaga passu

Et faciem longo pede signatura viatrix.

445

Vernanti minio suffusa labellula nullo

Vulgari pictore rubent; nec protrahit artis

Obsequium, quam sola dedit natura rubricam.

Non morsu solito parcenti dente labelli

Extorquetur honos, et quo suprema loquendi

450

Ianua vestitur, non huius exuit ostrum

Artificis pecten, orisque accensa gemello

Lumine sardonicis nativae primula candet.

Divite praecingit vallo redolentia linguae

Atria dentis ebur, qui nece livescere morbo

455

Erubet, aut putris olida ferrugine sordis.

Nec male radicum solidata sede, minuto

Agmine rarescit, necdum comes improbus instat

Proximus, urgenti cedens, extrarius errat

Nec minor est speciem merito vicinia fine.

460

Nec linguam reserat foribus distantia ruptis,

Aut clausos aperit spatii caesura penates.

Colle tumens modico convexi argentea menti

Area descendit, quantum studiosa venustae

Nobilitas formae decreverit, omnia iusto

465

Philosophata modo, praetenditur ordine lecto

Meta, nec effusum praegnati porrigit alvo

Curvatura sinum, teretisque licentia clivi.

Non nimis ausa brevi sinuatur fine decenti

Monticulo surgens, humili lascivula dorso.

470

Ningit in albenti mansura pruinula collo;

Nec quatitur ventis, nec anhelo carpitur aestu,

Verna, nec hiberno Boreae cessura tyranno,

Nec metuens Parthi dominum latrasse leonem,

Cum fumante furit timor anni Sirius arcu.

475

Gutturis illimi speculo contendit, ad unguem

Tersa superficies, cupidos vix lubrica tactus

Sustinet, ut possit digito labente repulsam

Erubuisse manus; non hic montana torosos

Multiplicat pinguedo gradus, testata gulosam

480

Finitimis clivosa iugis, non proxima nudos

Gutturis orbiculos cutis exprimit ossibus, arcto

Nubilis amplexu, paulo placitura recedit.

Nec carnis mediae, quod epenthesis addit avarae

Syncopat exertis macies ingloria nervis.

485

Omnis in hac una species consedit, ubique

Inseritur, nusquam declinativa, modumque

Iactitat in quovis spatio librasse venustum.