1

Dum flosculum tenera

Lactant veris ubera,

Dulci Progne modulo

Dulcem mulcet aera,

Ferit vocis iaculo

Philomena sydera.

2

Eram vacans ocio

Sub olive pallio,

Fons a dextris murmurat

Aquarum suspirio,

Et ver fontem purpurat

Flore multiphario.

3

Dum flores inspicerem,

Aures cantu pascerem,

Relabor medullitus

In amorem veterem,

Languet michi spiritus

Et cor bibit venerem.

4

Cupido, dux operis,

Aufer iugum Veneris!

Mea michi Niobe,

Quare non obsequeris?

Cur sic agis improbe?

Cur me pati pateris?

5

Dum contemplor uterum,

Dum recordor uberum,

Dum illi commisceor

Et semel et iterum,

Transcendisse videor

Gazas regum veterum.

6

Si te miles equitat,

Amor me nobilitat.

Nescis, quia legitur:

"Omnis amans militat,

Semper curis agitur

Et in castris habitat?"

7

Vt ultra non hesitem,

An diligas equitem,

Ozoycaysice,

Sive tibi militem,

Amoris ne despice,

Sed respice militem.