1

Ver pacis aperit telluris gremium,

Salutis reperit Remis remigium;

Iam Petrus exerit utrumque gladium,

Quo procul aberit incursus hostium.

2

Cui plus contulerit natura sapere,

Quam plus extulerit honoris honere!

Qui magis noverit sibi disponere,

Que vox, que poterit lingua retexere!

3

In unum confluit totus fons gratie,

Cuius ros imbuit rus conscientie.

Rivum, quem genuit rigor iustitie,

Flumen preterfluit misericordie.

4

Patet ad oculum facta translatio,

Vt per avunculum sororis filio

Gratie cumulum propinet unctio,

Que per miraculum dator Remigio.

5

Flens in miseriis urbs Senonensium

Patebit impiis per hoc divortium,

Patres cum filiis, genus egregium

Cedentur gladiis more bidentium.