Ne te gulosae Scylla voraginis

Mergat profunda nocte libidinum

Praebe palato frena modestiae,

Ventri tributum solve modestius,

5

Imbrem Lyaei semita gutturis

Libet modeste Bacchica pocula:

Pota parumper, ut quasi poculis

Bacchi putetur os dare basia.

Frangat Lyaei lympha superbiam,

10

Bacchi furorem flumina temperent:

Nuptam Lyaeo se Thetis offerat,

Frenet mariti nupta tyrannidem.

Plebaea, simplex, rara comestio

Carnis superbae murmura conterat.

15

Vt te tyrannus parcius urgeat,

Semper in ista carne superbiens,

Lentus Cupido sic aget otia,

Frenentur in te frena libidinis,

Languens stupescat carnis aculeus,

20

Ancilla fiet sic caro spiritus:

Largire visus pessula ianuae,

Frenes ocellos, ne nimis improbe

Venentur extra luminis impetus,

Praedamque menti nuntius offerat.

25

Si quos habendi fervor inebriat,

Exire cogant, mente pecuniam,

Mentis triumphum sentiat ambitus,

Victi premantur colla Cupidinis.

Non in crumenis ipsa pecunia

30

Clausis moretur, pigraque dormiat,

Nulli vacando, sed magis excubet,

Custos honoris divitis usibus:

Si tempus adsit, si locus exigat,

Surgat sepultae massa pecuniae,

35

Nummos crumenae funditus evomant.

Quaevis honori munera militent.

Calcare si vis colla superbiae,

Flatus tumoris, fulmina spiritus,

Pensa caducae pondus originis,

40

Vitae labores mortis et apocham.