Discipulus Goliae episcopi de grisis monachis

Sompno et silentio plusquam satis usa,

A torporis otio surge, mea musa;

Scribe sub compendio, et non sis profusa,

Nam in multiloquio culpa est inclusa.

5

Ornat orbem inclitus ordo monachorum,

Qui lapsus divinitus a summo coelorum

Babel perdit funditus et Vr Chaldaeorum,

Et per ipsum servitus perit idolorum.

Mirae sunt continentiae, mirae parcitatis,

10

Hostes vanae gloriae, hostes vanitatis,

Frigore et macie se affligunt gratis,

Vt sic possent specie frui deitatis.

Cultus his exterior rudis et abiectus,

Cibus est austerior, et stratus neglectus,

15

Sermo quoque parcior, et vix intellectus,

Nullus ordo sanctior, nullus tam perfectus.

Terrena despiciunt causa futurorum,

Centuplum accipiunt pro contemptu horum,

Violenter rapiunt regna beatorum,

20

Sola illis sapiunt gaudia coelorum.

Ihesu bone, talium rector monachorum,

Qui iudex viventium es et mortuorum,

Me si placet socium facias eorum,

Hiis me iungas omnium in festo sanctorum.

25

Miris effers laudibus gentem tunicatam,

Gentem cunctis gentibus merito ingratam,

Sub ovilis vestibus lupos imitatam,

Gentem plenam fraudibus et rapinis datam.

Continentes minime possunt appellari,

30

Sed rapaces maxime et nimis avari,

Nam student nequissime capere praeclari,

Et horto rectissime possunt comparari.

Tenuis refectio pseudoprophetarum,

Et vestis abiectio notat cor avarum;

35

Gerunt sub silentio animum amarum,

Fucata religio nil valet aut parum.

Nil nisi praesentia sitiunt aut quaerunt,

Farsiunt marsupia, metunt quae non serunt,

Pauperum penuria sese ditaverunt;

40

Satanae mancipia sunt et semper erunt.

Duo sunt qui nesciunt satis detestari,

Quae exosa sentio coelo, terrae, mari,

Quibus omnis regio solet devastari,

Quibus nullo studio potest obviari;

45

Pestis animalium, quae shuta vocatur,

Et Cisterciensium quae sic dilatatur:

Duplex hoc contagium orbem populatur,

Quod sit magis noxium prorsus ignoratur.

Carent femoralibus partes turpiores,

50

Veneria ut usibus sint paratiores,

Castitatis legibus absolutiores;

In cunctis hominibus nulli sunt peiores.

Circumdate labia, precor, musa mea,

Propter dicta talia iudicaris rea,

55

Turpe est per turpia quaerere trophaea.