Gratuletur omnis caro nato Christo domino,

Qui pro culpa protoplasti carnem nostram induit,

Vt salvaret, quos plasmavit dei sapientia.

Verbum patris caro factum nascitur ex virgine,

Non amissa deitate formam servi suscipit,

Vt peccatum de peccato damnaret omnipotens.

Magnam valde commendavit per Iohannem gratiam,

Baptizatus in Iordane lavit mundi crimina,

Vt credentium purgaret gentium piacula.

Quem et vox paterna vocat: "Ecce meus filius,

In quo complacui, dilectus, caeli terrae dominus,

Ipsi gentes oboedite regesque subdimini."

Qui venit surdis auditum, caecis visum reddere,

Claudis gressus restaurare, mortuos viviscere,

Paraliticos curare, daemonesque pellere.

Leprosos quoque mundare, morbos omnes tergere,

Fluctus maris mitigare, ire super latices,

Et ignota demonstrare saeculis miracula.

Nam et sponte immolari voluit pro omnibus,

Colaphis, sputis infectus, coronatus sentibus,

Lignoque clavis confixus in crucis patibulo.

Hoc in ligno vitis vera pinguem botrum protulit,

Ex qua nobis manaverunt sacramenta maxima:

Sanguis roseus et aquae, quae libantur mistice.

Mersus traxit victor antri tetri laetus Tartara,

Terra tremuit ab imo, crepuerunt marmora,

Et multorum tunc sanctorum surrexerunt corpora.

Virus pepulit chelidri et momordit inferos,

Patriarchas captivatos longum post exilium

Ab inferno liberavit, paradysum transtulit.

Claustra ferrea disrupit et concussit Tartara,

Terra tremuit ab imo, crepuerunt marmora,

Et multorum tunc sanctorum surrexerunt corpora.

Exultate nationes plausu cordis intimo,

Quia vicit leo fortis draconem pestiferum;

Passus est et resurrexit cum triumpho nobili.

Sedem caeli repedavit, dextra patris residens;

Inde creditur venturus in die iudicii,

Mundi molem inflammare, impios exurere.

Reddere sanctis mercedem digno de certamine,

Qui praecepta servaverunt testamenti gemini,

Vt effecti cives dei socientur angelis.

Gloria aeterno patri et agno mitissimo,

Qui frequenter immolatur permanetque integer,

Vtraque natura deus cum spiritu sancto, amen.