De Mure et Rana

Mus timidus, flumen cupiens transire nec audens,

      A Rana supplex auxilium petiit.

Illa suam promittit opem, filoque ligavit

      Muris iniqua pedem cum pede Rana suo;

5

Sicque natando trahens miserum per flumina Murem

      Sese mersit aquis, sicque necavit eum.

Insultans misero post haec et laeta coercens,

      Dum tutam sub aquis se putat esse suis,

A Milvo rapitur fluitans Mus, tractaque filo

10

      Cum socio rapitur pendula Rana suo.

Quisquis credentem sibi prodit, proditur; ille,

      Sicut Rana, suo iure perit laqueo.