De Monte praegnante et parturiente murem

Cum gemitu magno Mons praegnans parturiebat,

      Mugitu magnum exuberans tonitrum.

Vicinos omnes timor ingens excruciabat;

      Auxilii nullus consiliive locus.

5

Dicebant: "Terram cum Mons hic occupet istam,

      Quid faciet partus illius immodicus?"

Illius subito cumulus nos obruet ingens,

      Membraque non minimo pondere nostra teret.

Murem post multas peperit Mons ille querelas;

10

      In risum versus sic fuit ille metus.

Dicitur elatis istud qui, maxima iactent

      Cum se facturos, vix modicum faciunt.