De aquila et testudine

Ausus illicitos punit grauis exitus; alti

      Ascensus ingens esse ruina sole[n]t.

Ambitus est pestis sibi perniciosa; ruinam

      Ista uexatus peste timere potest.

5

Exiguis rebus indignus ardua tendit,

      Danus muneribus cuncta licere putans.

Testudo cupiens ferri per inane, dolorem

      Exponit, uerbis talibus orsa, suum:

Inuidisse mihi naturam sencio; uires

10

      Desunt, nulla fuge spes datur; ha! quid agam?

Si lateo, latebras manifestat semita squalens;

      Si moueor, motus segnior esse nequit.

Pro clipeo testam fragilem gero, lumina desunt,

      Tucior haut possum cornibus esse meis.

15

Alitis auxilio mihi quod natura negauit

      Assequar; audaces sors iuuat; astra petam.

Regine uolucrum dabo munera: numina quamuis

      Sint irata, potest flectere gemma micans.

Vrbes cum uicis, campos, siluas, iuga, ualles,

20

      Flumina, prata, lacus cernere dulce puto.

Cernere tot rerum species cupiet Iovis ales;

      Aer tam purus me recreare potest.

Ocia degeneres animos languencia reddunt.

      His dictis, ales nobilis ima petit.

25

Fit uoti compos, sublimis in aera fertur

      Testudo; terras linquere dulce putat.

Penituit cepti miseram; genuit, estuat, ardet:

      Ales compressis unguibus ar[c]tat eam.

Ex[s]pirat; tenues miser euanescit in auras

30

      Spiritus. Hinc discas quam sit amanda quies!

Contempnunt plures tranquillam ducere uitam:

      Ipsa quies miseris esse molesta solet.

Sollicitauit aues Testudo: Mirare felixque

      Si qua meis uotis annuat, inquit, erit.

35

In sublime uehi cupio: ditabo uehentem

      Gemma; deliciis me recreabo nouis.

A facie terre mox rapta, leuatur in auras:

      Dulce solum celis tucius esset ei.

Vnguibus incluse fugiendi nulla potestas

40

      Est data; sed moriens ultima uerba dedit:

Hunc metuat quisquis suspirat ad ardua finem!

      En pereo; pereat exicialis honor!

Conuenit uolucrem Testudo, rogans ut in auras

      Ferret eam; pretio uincitur illa dato.

45

Fertur ad ethereas partes; constricta feroci

      Vngue, dies uite clausit: amanda quies.