1

Innovatur nostra laetos

Terra flores proferens;

Ver novum praesentat aestas,

Dum datur te cernere.

Imperator magne, vivas

Semper et feliciter.

2

Gaudeat totum tuorum

Agmen hic fidelium,

Omnis aetas, omnis ordo

Corde dicens intimo.

Imperator magne, vivas

Semper et feliciter.

3

Extet adventus beatae

Nunc tuae praesentiae,

Gaudio plenus sereno

Et favore simplici.

Imperator magne, vivas

Semper et feliciter.

4

Iuste, felix et benigne,

Mitis et piissime,

Pande mentis hic nitorem

Nostra complens gaudia.

Imperator magne, vivas

Semper et feliciter.

5

Quod minus digne valemus

Servitute debita,

Hoc tui donet favoris

Laeta nobis gratia.

Imperator magne, vivas

Semper et feliciter.

6

Sancta, Lothari, Maria

Virgo te cum fratribus

Et simul cum patre magno

Servet, armet, protegat.

Imperator magne, vivas

Semper et feliciter.

7

Et Valens iunctus beatis

Hoc precetur omnibus,

Vestra pax ut pace cunctos

Firmet apta subditos.

Imperator magne, vivas

Semper et feliciter.

8

Intus, extra, longe, iuxta

Fulgeat concordia;

Britto cedat atque Bulgar,

Omnis ardor hostium.

Imperator magne, vivas

Semper et feliciter.

9

Vita, virtus et potestas,

Robur et victoria,

Fama felix te sequatur

Atque vitae praemia.

Imperator magne, vivas

Semper et feliciter.

10

Summa summae trinitati

Sit per aevum gloria,

Quae gubernet et coronet

Te per omne saeculum. amen.

Imperator magne, vivas

Semper et feliciter.