Quid facis, o segnis, rex indignissime regnis,

Quid facis, o legum subversor, pessime regum,

Oppressor iuris, presentibus atque futuris

Invisum nomen, sceleratum nominis omen!

5

Nomen Alexis habes, hominum fedissima labes,

Quod "sine sermone" nostra sonat edicione,

Quo designatur, ne quisquam iure loquatur

Vlterius de te, vir fraude dolisque replete,

Ne quis de tali, tam fedo, tam furiali

10

Sermonem faciat nec post hoc mencio fiat

Vlla tui prorsus, qui tantum crimen adorsus

Fratrem cecasti, fratris tibi regna dicasti.

Ergone, sic ergo verso fugis, improbe, tergo?

Primi conflictus sola formidine victus,

15

Primo conflictu vix ullo territus ictu

Vinceris et fede spreta fugis, improbe, sede,

Quam tibi tam vasti sceleris mercede parasti.