Nomina Musarum doctrinarumque suarum

Nunc explanabo, uerbis breuibus reserabo.

Euterpe bona delectatio sit tibi prima,

Dulce canens tibi Melpomene sit Musa secunda,

5

Tertia Terpsichore, quae rerum instructio fertur,

Calliope quasi Callophone sic quarta uocatur,

Quintaque sit Clio tanquam meditatio rerum,

Ex simili simile quae repperit haec Erato sit,

Pluraque dans Polyhymnia sit, polys hoc manifestat,

10

Reddit subtiles animosque Thalia capaces,

Tanquam caelestis Vrania nona tibi sit.

Prima tubas ciet Euterpe, tragicumque secunda

Melpomene carmen inuenit, Terpsichoreque

Psalterium, sed Calliope commenta figurat,

15

Historicos Clio dat nos, Erato geometras,

Rhetoricos Polyhymnia comoedosque Thalia,

Ast Vrania sit quae repperit astrologiam.

Saturnus genuit tres Neptunumque Iouemque

Plutonemque, quibus diuisa est machina triplex.

20

His mater fuit Ops Rea seu Ceres atque Cubele,

      Ex ope siue reor, a creo siue cubon.

Stellas errantes septem dic esse planetas:

Luna Venus Stilbon Sol Saturnus Iouis et Mars.

Sol lucens solus, a luceo luna Venusque

25

A ueneror, kyrios mercantum Mercurius sit,

Mars mors, Iuppiter a iuuo, Saturnus satur annis.

Est Aries Taurus Gemini Cancer Leo Virgo

Libraque Scorpius et Sagitarius et Capricornus,

Est et Aquarius, hunc comitantur postea Pisces.

30

Haec opponuntur ut in ordine quaeque sequuntur:

Est Li. Ari. Scor. Tau. Sa. Gemi. Capri. Can. A. Le. Pis. Vir.

Est tibi, Saturne, domus Eglocerontis et Vrnae,

Inde Ioui dona Pisces simul atque Chirona,

Est Aries Martis et acutae Scorpio partis,

35

Libram cum Tauro Venus ambit purior auro,

Suscipit Erigonen Stilbon geminumque Laconem,

Cesserunt soli Cancer lunae Leo soli.

Saturno nati tres sunt: Neptunus aquarum;

Iuppiter astrorum genitor, Pluto miserorum.

40

Gorgoneae tres monoculaeque fuere sorores,

Stheino scilicet Euryaleque simulque Medusa.

Hesperides quoque tres: Aegle Neptusa Arethusa.

Harpyiae quoque tres: Aello Ocypeteque Celaeno.

Tres quoque fatales quae ducunt fila sorores,

45

Clotho colum portat, Lachesis trahit, Atropos occat.

Tres quoque gratuitae dant gratis grata sorores,

Dic Euphrosynen, dic Eugala Pasitheamque.

Nautarum quoque tres tu dicas esse timores:

Sirenes siue Scillam Syrtesque Charybdim.

50

Tres quoque censores apud infera sunt quasi reges:

Cognitor est ueri Minos cogitque fateri,

Veraque scrutanti censura datur Radamanthi,

Tu miseros punis ardentibus, Aeace, prunis.

Sermonum genera tria sunt Graeceque uocantur

55

Dragmaticon hermeneticon didascaliconque,

Donatum quaeras, Aeneida bucoliconque.

Tres Triuiae sedes: Diana Proserpina Luna.

Eumenides quoque tres: Tesiphone Allecto Megera.

Tres mundi partes: Europa uidelicet atque

60

Africa, quis Asiam maiorem connumerabis.

Tres triuii species dic lexim syntasa resim.

Ortho. proso. diasyn. species tres grammaticae sunt.

Tres cellae sunt: fantasis et logice memoransque.

Tresque trium fratrum tu dicas esse tridentes.

65

Fulminis est triplex species: flat findit et urit.

Nabilis est aqua, labilis et potabilis ipsa.

Cerberus omne uorans tria possidet ora canina.

Fertur menoides unius luna diei,

In partes diuisa duas diatomos exstat,

70

Est amphicyrtos cum paene est lumine plena,

Est panselenos cum splendet lumine plena.

Naiades fontis sint, Oreades tibi montis,

      Sint Dryades nemoris Nereidesque maris.

Napaeae florent, Amadryades arbore gaudent,

75

      Et cum qua uiuunt et sine qua pereunt.