Summum satorem, solia

Sedit qui per aethralia,

Alti Olimpi arcibus

Obvallatus minacibus,

5

Cuncta cernens cacumine

Caelorum summo lumine

Alta poli et infima

Telluris latae limina,

Cuius inmensa munera

10

Nequeo prorsus, funera

Antequam rictu rabido

Raptent et rodant avido

Ore halitum, corpore

Mortis rigente torpore,

15

Carminare concentibus

Celsae laudis stridentibus,

Ipsum profecto precibus

Peto, profusis fletibus

Allidens libentissime

20

Solo tenus saepissime

Curvatam colli cervicem

Capitis atque verticem:

Titubanti tutamina

Tribuat per solamina

25

Sacrosancta sublimiter;

Suffragans manu fortiter

Alma per adminicula

Hostium demat spicula,

Quibus infesti fortibus

30

Forant thoracas humeris,

Christi tyronum cassibus

Caesis foedis fragoribus

Afflant necantes imbribus

Telorum emicantibus.

35

Illos, illos Omnipotens

Trudat aeternis tenebris,

Vbi typo teterrimus

Tostos globorum gremiis

Girat torquens gurgitibus

40

Atri ignis ultricibus.

En, pilorum acerrima

Parma pellat acumina,

Hostium a ferocibus

Protegens arundinibus

45

Concertantes agonibus

Christo semper fidelibus!