Arbor alta, crux beata, virtus orbis unica,

Sola digna, salve, lecta ferre mundi pignera,

Tuta navis, urbs munita, compta regis purpura.

Pax perhennis, horror ostis, crux, ave, nobilis

5

Fons salutis, ars amoris, pignus almi federis,

Tu decora sic consiste lota sacro sanguine.

Sole vibrans, nemphe clara luce terrens Tartara,

Tu Marie rore cresce, lata tende brachia,

Mortis Eve iura solve, viva funde flumina.

10

Quatuor quadrangulatis haec nitet virtutibus,

Crux fidelis more matris nutrit, ambit, diligit,

Spes volando celi recta summa poscit ethera.

Latitudo caritatis ampla donat munera,

Longa virtus, fortis aula, docta ferre prelia,

15

Lucis auctor, orbis emptor hanc honorat gratia.

Crux regendo mundi cuncta rite complet competa,

Vesper, ortus, auster imus et sinister aquilo,

Messis, estus, ver et frigus his quadrata partibus.

Crux nitendo nonne totum consecravit seculum?

20

Hac nitentque Christi quadra prorsus evangelia,

Cetus hac apostolicus consecratus gloria.

Vera manat inde vita, regnat immortalitas,

Crux ammena patrum palma, crux prophetis dignitas,

Crux peregrinorum doxa, crux regum victoria.

25

Crux piorum laus virorum, crux triumphus martirum,

Crux egrotis vis vigoris, crux ligamen virginum,

Crux monachis dux herilis, crux corona presulum.

Crux parata nautis portus, arcs dei militibus,

Crux tutela, lex, auriga, crux regalis anchora,

30

Cruxque lumen et sophia, crux gubernat omnia.

Crux sacrata splendet alma, sponte pendit, regia,

Cuius iure constat omne, quidquid durat in orbe,

Mors et vita, caelum, terra, pontus atque sydera.

Crux colenda, nosque serva per trophea mistica,

35

Crux benigna, regis ara, pacis adde federa,

Crux amanda, vere cara, duc nos supra sidera.

Numen unum gloriosum, salve, sancta trinitas,

Per crucis nos misterium salva, simplex unitas,

Sit tibi, deo perhenni, sempiterna claritas.