Vrbem Cappadoces habitant, quos ille refertur

Progenuisse Mosoch, veniens de semine Iafeth,

Quos Asiae versus occasum rura minoris

Armeniaeque latus per fines tangit Eoos,

5

Campus Amazonidum Septen - de parte - trionis,

Nubifer opponit calidum iuga Taurus ad austrum.

Quam virtute potens construxit Perseus olim,

Post Romana suis rebus laetata potestas,

Caesaream vocitare dedit. Peregrinus et hospes

10

Corporis ac mundi felix hanc incola Mammes

Incoluit partim, caelum nam mente petebat,

Vtque fides sobolis multo pretiosior esset,

Perfectam tenuere fidem pietate parentes

Et natum docuere sui servare timendo

15

Lucida iussa dei; non segnior ille repertus,

Moribus aetatem, sensu tener extulit annos.

Carne puer, sed corde senex, qui deinde parentum

Post mortem custos vitae cautissimus almae,

Observans mandata dei dedit ocius artae

20

Exemplum normamque viae. Latitare nequibat

Vrbs in monte sedens, modio neque tecta lucernae

Flamma perit, sed lumen agens in domate cunctis

Cunctorum in sese purum convertit amorem.