Vir domini agnoscens ideo remanere libenter,

Vt grege cum proprio foetas mulgeret agrestes,

Accedens niveo sinum de fonte replevit.

Caseus efficitur paulatim lacte coacto

5

Pinguis et inmissis ditescit fiscina formis.

Cernit abundantes lactis de munere fructus,

Et rogat, ut dominus quicquid velit inde futurum

Ostendat; tum sancta virum mox iussio portas

Caesareae properare iubet, tandemque repertis

10

Pauperibus, viduis, orbatis luce parentum,

Quod dominus tribuit, largis contradere palmis

Non secus ac iussum est, prompto perfecit amore.

Saepius haec passim cives miranda videntes,

Invidiae pulsante malo conspectibus assunt

15

Fortis Alexandri, qui dudum praeses ab illo

Missus erat, nonam qui movit in orbe procellam

Christicolis, cuius sanctum lex horrida Mammem

Propulit in montem. "Clemens o praeses, obaudi",

Accusator ait, "quendam de stirpe magorum

20

Vidimus inlicitis leges mutare ferarum

Carminibus, sollers ortas compesce querellas."