Archicancellarie viris maior ceteris,

Splendore prudentie, qua prudentes preteris,

Iubar es ecclesie, sicut sol est etheris.

Laudes tibi canimus, cuius luce iubaris

5

Illustratur animus Friderici Cesaris,

Quod libenter facimus, cum sis dator hilaris.

Pollens bonis moribus et nitore generis,

In humanis artibus et divinis litteris

Tersis maior omnibus nullo minor crederis.

10

Vir fortis et sapiens Fortunam non sequeris;

In adversis paciens, modestus in prosperis

Cuncta bene faciens recta via graderis.

Vlixe facundior Tulliane loqueris,

Columba simplicior nulli fraudes ingeris,

15

Serpente callidior a nullo deciperis.

Alexandro forcior inimicos conteris,

David mansuecior a cunctis diligeris

<Et> Martino largior das, quod iuste peteris.

In regni negocio fit, quodcumque precipis,

20

Qui sine consilio nichil prorsus incipis;

Vim det tanto socio mens Romani principis.

Adhuc starent menia Mediolanensium

Nec Cesar per prelia victor esset hostium,

Nisi dei gracia te dedisset socium.

25

Electum Colonie claris dignum laudibus

Pre multa pauperie nudis laudo pedibus;

Conqueror hoc hodie coram sanctis omnibus.

Dum sanctorum omnium colitur celebritas,

Singuli colentium gerunt vestes inclitas,

30

Archicancellarium vatis pulsat nuditas.

Poeta composuit racionem rithmicam,

† atyrus imposuit melodiam musicam,

Vnde bene meruit mantellum et tunicam.