Iubilemus Salvatori

Quem coelestes laudant chori

Concordi laetitia:

Pax de coelo nuntiatur,

Terra coelo foederatur,

Angelis Ecclesia.

Verbum carni counitum,

Sicut erat praefinitum,

Sine carnis copula

Virgo parit, Dei templum,

Nec exemplar, nec exemplum

Per tot habens saecula.

Res est nova, res insignis,

Quod in rubo rubet ignis

Nec rubum attaminat:

Coeli rorant, nubes pluunt,

Montes stillant, colles fluunt,

Radix Iesse germinat.

De radice flos ascendit

Quem Prophetae praeostendit

Evidens oraculum:

Radix Iesse regem David,

Virga matrem praesignavit

Virginem, flos parvulum.

Mira floris pulchritudo

Quem commendat plenitudo

Septiformis gratiae.

Recreemur in hoc flore

Qui nos gustu, nos odore,

Nos invitat specie.

Iesu, puer immortalis,

Tuus nobis hic natalis

Pacem det et gaudia;

Flos et fructus virginalis,

Cuius odor est vitalis,

Tibi laus et gloria!