Ad iuvenem et puellam affectuosius se invicem intuentes

Occurrunt blando sibi lumina vestra favore,

      Et voto arrident intima corda pari:

Alterno facies sibi dant responsa rubore:

      Et tener affectum prodit utrinque pudor

5

Mutua discurrens ultro citroque voluntas

      Lascivum mentes foedus inire facit.

Alternis radiis oculorum flamma refulget,

      Perplexusque oculos foederat intuitus.

Ipsae animae proprias quasi permutasse videntur

10

      Sedes, inque novis degere corporibus.

Complexus tacitos animorum gratia nectit,

      Corporeisque parat nexibus auspicium:

Procedet felix duplicato copula nexu,

      Concurrentque suis corpora spiritibus

15

Vtilis optatos dabit exspectatio fructus,

      Et laetos parient anxia vota dies.