1

In natale Salvatoris,

Angelorum nostra choris

Succinat conditio:

Harmonia diversorum,

Sed in unum redactorum,

Dulcis est connexio.

2

Felix dies hodiernus,

In quo Patri coaeternus

Nascitur ex Virgine!

Felix dies et iocundus!

Illustrari gaudet mundus

Veri solis lumine.

3

Ne periret homo reus,

Redemptorem misit Deus,

Pater unigenitum;

Visitavit quos amavit

Nosque vitae revocavit

Gratia, non meritum.

4

Infinitus et Immensus

Quem non capit ullus sensus

Nec locorum spatia,

Ex aeterno temporalis,

Ex immenso fit localis,

Vt restauret omnia.

5

Non peccatum, sed peccati

Formam sumens, vetustati

Nostrae se contemperat:

Immortalis se mortali,

Spiritalis corporali,

Vt natura conferat.

6

Sic concurrunt in personae

Singularis unione

Verbum, caro, spiritus,

Vt natura non mutetur

Nec persona geminetur,

Sed sit una penitus.

7

Tantae rei sacramentum

Latet hostem fraudulentum;

Fallitur malitia.

Caecus hostis non praesagit

Quod sub nube carnis agit

Dei sapientia.

8

Huius nodum sacramenti

Non subtilis argumenti

Solvit inquisitio.

Modum nosse non est meum;

Scio tamen posse Deum

Quod non capit ratio.

9

Quam subtile Dei consilium!

Quam sublime rei mysterium!

Virga florem,

Vellus rorem,

Virgo profert filium.

10

Nec pudorem laesit conceptio,

Nec virorem floris emissio:

Concipiens

Et pariens

Comparatur lilio.

11

O Maria, stella maris,

Spes post Deum singularis

Naufragantis saeculi,

Vide quam nos fraudulenter,

Quam nos vexant violenter

Tot et tales aemuli.

12

Per te virtus nobis detur,

Per te, mater, exturbetur

Daemonum superbia;

Tuae proli nos commenda,

Ne nos brevi, sed tremenda

Feriat sententia.

13

Iesu, noster salutaris,

Qui prudenter operaris

Salutis mysterium,

His qui colunt hunc natalem

Da salutem temporalem,

Da perenne gaudium.