Pergenti sudum dimissa per aera venit

Vox aiens: "Ascende, virum sanctissime Mammes,

Ianua te caeli paradisi et claustra patenti

Excipiunt gremio, gaudet te Christus adire,

5

Quamque tibi portat tandem meruisse coronam.

Iam propera, sanctus quem flatus ubique gubernat,

Angelicos cernes misso certamine cives."

Hic dominum laudans orat mox talia Mammes:

"Haec illis dimitte, precor, nec reddere iudex

10

Quae fecere mihi, districto examine quaeras.

Talia qui mandas, exaudi talia clemens

Atque animam permitte meam cum pace reverti

Ad requiem quandoque suam post proelia mundi."

Dixit et aetheriam conscendit spiritus aulam

15

Liber in aeterno semper mansurus honore,

At somnus sanctae conclusit lumina carnis.

Semina quae lacrimis Mammes infusa serebat,

Messuit hic fructu gaudens; qui flebat eundo,

Fert veniens plenos laetus mercede maniplos.